“Daiq gou cij gangj doenghbaez miz bouxsai ndeu, de gyaez boux dahsau ndeu, hoeng boux dahsau haenx mbouj gyaez de, ndigah, doeklaeng……”

“Baenz lo baenz lo! Gij goj neix gou gaenq ndaejnyi geij bak baez lo, dingq ndaej mbwq caez!” Aulungz- gveiz sawqmwh sing hung hat gou, “ba” sing ndeu, gij vanj caeuq dawh gwnz daiz diuq le geij conq sang, buenq vanj laeuj de hix deng sinz okdaeuj haujlai.

Gou deng de hwk baez he, aj bak yawj de, ndawsim cingq ngeix baenzlawz ndaej deuz ok aen ranz iq daemq neix, mboujnex aiq deng de dub.

“Mwngz gaej deuz!” Baez sing hemq ndeu, gou ngamq yaek ndwn hwnjdaeuj youh naengh roengzbae lo. Yienznaeuz Aulungzgveiz bingzciengz gig hozunq, cungj deng dou riu de guhcaemz, hoeng ngoenzneix de miz di gvaiq, baenzlawz baenzneix yaep he angq yaep he huj? Caeux rox de baenzneix, mboujlwnh baenzlawz gou hix mbouj gamj byaij haeuj ndaw ranz de daeuj.

De yawj gou dauqcungz naengh roengzdaeuj, saeknaj sawqmwh youh bienq lo, lumj bingzciengz nei riunyumnyum, bungj vanj laeuj hwnjdaeuj, ndoet gij laeuj ndaw vanj sat bae, daek gij nohngwz ndaw rek coq youq aen vanj hung ndeu, caiq coq di raemx roengz ndaw rek bae, dawz aen rek cuengq youq gwnz cauq, doeklaeng cienq ndang doxdauq, naengh youq aen gvih ciengx ngwz baihgwnz.

“Aulungzgveiz, gou siengj maranz lo.” Gou swngz de lij cingq- ciengz, caeuq de naeuz.

“Lij rongh.”

“Mbouj, mbwn yaep laep lo.”

“Yaep di gou soengq mwngz maranz!”

“Gou rox gag dauq.”

“Mbouj baenz, mwngz naengh gonq, haemhneix gou aeu gangj goj hawj mwngz dingq.”

“Ngoenzcog gangj baenz mbouj baenz? Gou iu Ah Veij gyoengqde youq laj gofaexnganx caj gou lo.”

“Mbouj baenz!” Aulungzgveiz aeu lwgfwngz vix naengbak de, sawq- mwh bienq ndaej gig unqswnh:“Haemhneix gou itdingh aeu gangj, caemhcaiq cij gangj hawj mwngz boux dog dingq ndwi! Rox lwi?”

Bonjlaiz gou ceiq ngah dingq gyoengq vunzhung gangj goj lo, lumjbaenz Baeuqroxdoh caux mbwn- dieg、Mehlwg ra dinmbwn caeuq Daiqyahmui doenghgij goj neix, caen dwg dingq mbouj nywnx gvaq. Hoeng, ngoenzneix gou mbouj mbwq dingq lo, lau yaep he aiq deng de ndaq.

(caengz sat)