Vunz naeuz, youq ndaw cwngfuj yanghcin guhhong, gij hong haenx cungj dwg caeuq vunz lajmbanj mizgven, ganbu yanghcin aeu roengz mbanj bae, haeuj ranz bouxguhnaz bae, yienghneix cij guh ndaej ndei faenh hong neix.

Youq ndaw cwngfuj yanghcin, gyoengq ganbu haenx haemq noix miz ranzbanhgoeng dinghmaenh, couhcinj miz, hix mbouj ndaej lumj mbangj ganbu ndaw singz yienghhaenx cwxcaih.

Moix ngoenz gyanghaet ngamq hwnjban, gyoengq ganbu yanghcin ngamq byaij haeuj ranzbanhgoeng, aen gumq ngamq naengh nem daengq, gij saenqsik gak cungj gak yiengh couh cienzdaeuj——dieg oij baihdoeng Mbanjcangh dawzfeiz lo, baihsae Mbanjlij miz vunz aenvih ceng reihnaz yaek doxhoenx lo, aen raengz- romraemx baihnamz ok yungyiemj lo…… Doenghgij saeh neix luenh- nyagnyag, mbouj vaiqdi roengz mbanj bae cawqleix couh deng feiz comh caekhaex bw, yienghneix gij ganbu yanghcin lij miz maz simgei naengh youq ndaw ranzbanhgoeng dem, vaiqdi okdou bae roengz mbanj ha!

Roengz mbanj guhhong, ceiq nanz guh dwg baenzlawz guh doengh gij swhsiengj vunzguhnaz, baenzlawz dawz gij cwngcwz baihgwnz gak gaep cwngfuj caeuq bumonz doeksaed daengz lajmbanj bae, baenzlawz gangj daengz gyoengq vunzguhnaz simfug bae. Mizseiz, gij cwngcwz caeuq fapgvi baihgwnz sij ndaej cingcing cujcuj, doiq bouxguhnaz miz leih youh miz- ik, hoeng miz saek seiz bouxguhnaz caengz naemj ndaej doeng, yienghneix ganbu yanghcin couh aeu roengz mbanj bae gangj dauhleix、gangj cwngcwz, gangj daengz doeng bae cij suenq guhhong sat. Mbouj miz banhfap ha, bouxlawz heuh mwngz dwg ganbu yanghcin ne?

Geij bi gonq, gou youq Fuzsuih Yen Liujgiuz Cin Cwngfuj guhhong, bau guenj aen mbanj heuhguh Liujgiuz Segih. Yienznaeuz gangj dwg segih, gizsaed couhdwg aen mbanj ndeu, mbanj neix faensanq baenz 9 aen mbanj iq, miz 3600 lai boux vunz. Miz bi ndeu daengz nienzdaej le, baihgwnz iu’gouz vunzlai gak mbanj aeu camgya sinhhingz nungzcunh hozcoz yihliuz, moix vunz gyau 10 maenz ngaenz, yinvu dou dwg aeu hawj gak mbanj camgya vunzsoq daengz 80% doxhwnj. Seizhaenx, sinhhingz nungzcunh hozcoz yihliuz cwngcwz ngamj saedhengz mbouj geij nanz, vunz lajmbanj caengz rox cwngcwz neix, caemhcaiq caengz ndaej gvaq gij ndeicawq cwngcwz neix. Yienghneix haujlai vunz cungj mbouj saenq geijlai, cungj ndi’ngah camgya. Moix ngoenz banhaemh, gou caeuq ganbu bau mbanj、cunhganbu doengzcaez roengz mbanj, ranz dem ranz bae senhconz fatdoengh. Dou lij beng dienhdaeng daengz gyang mbanj bae, youq gizde an aen lahbah hung, fanfoek senhconz gij ndeicawq sinhhingz hozcoz yihliuz. Yienznaeuz gyoengqvunz daeuj yawj ndaej lai, hoeng dwg yawj nauhnied lai gyau cienz gig noix.

Miz mbangj vunz mbouj gyau ngaenz couh suenq lo, lij baklai bakdeih gangjbemx dem:“Gou fouz bingh fouz in, gyau cienz ien’uengj guh maz?” “Gyau geijcib maenz miz maz yungh, dawz ngaenz neix bae cawx nohmou lij ndaej geij gaen noh gwn daengz nywnx bae!” “Gou gyau cienz le, danghnaeuz gyoengqsou dawz cienz gou bae gwn youh baenzlawz guh?” Miz haemh ndeu, gou caeuq cunhganbu buet hwnj buet roengz, nyaengq daengz doengxhaemh 11 diemj cung, cij byaij ndaej 3 aen mbanj iq 80 lai ranz, gou byaij daengz ga saenz lo, gangj ndaej myaiz hawq lo, hoeng cij miz 40 lai vunz camgya, sou ndaej gij cienz mbouj daengz cien maenz.

Daengz nienzdaej gyoepsuenq, aen mbanj gou bau haenx camgya sinhhingz nungzcunh hozcoz yihliuz beijlaeh cij daengz 60%, mbouj daengz yinvu iu’gouz, mboujdan deng bouxdaeuz bihbingz, hix ngaiz mbangj vunz ndaw mbanj riu, gou couh lumj duznou ndonj haeuj ndaw fung- sieng——song mbiengj cungj souh- heiq, hojsouh lai lo.

Hoeng, naemj daengz swhgeij dwg boux ganbu, ganbu aeu vih bouxguhnaz guh di saeh, couhcinj gienh saeh neix nanz guh hix aeu guh roengzbae. Dou laebdaeb bae senh- conz, vunzlai hix cugciemh raen daengz gij ndeicawq sinhhingz nungz- cunh hozcoz yihliuz lo, gyoengqde couh haengj camgya lo. Daengz bi 2008 nienzdaej, Liujgiuz Cin 13 aen mbanj 3 fanh lai vunz, mbouj yungh daengz 10 ngoenz couh fatdoengh ndaej 99% vunzlai camgya, mauhgvaq gij yinvu baihgwnz dingh haenx.

“Aeu sim bae caeuq vunz gyau sim, yienghneix couh mbouj miz saeh maz guh mbouj baenz lo.” Ganbu yanghcin roengz mbanj guhhong, caeuq bouxguhnaz gyau sim, caeuq bouxguhnaz guh baengzyoux, gangj vahdoj, yienghneix bae guh hong lajmbanj cij swnhleih. Lij miz gienh saeh daegbied ndeu, guh ndei gienh saeh neix le, bouxguhnaz couh caeuq mwngz guh baengzyoux ndei, gienh saeh neix couhdwg gwn laeuj. Seizneix miz gvidingh ganbu mbouj ndaej luenh gwn laeuj lo, hoeng bouxguhnaz mboujguenj mwngz baenzlai, de naeuz laeuj de dwg gag oemq, mbouj aeu ngaenz bae cawx, mwngz caeuq de gwn song cenj, couhdwg yawj ndaej hwnj de. Danghnaeuz mwngz ndi’ngah caeuq de gwn laeuj, mwngz couhdwg yiemz de hoj yiemz de uq. Mwngz naengh ndaej roengzdaeuj caeuq bouxguhnaz caemh daiz gwn laeuj, gyoengqde nyinhnaeuz mwngz yawj- naek de, couh dawz mwngz guh baengzyoux ndei, couh haengj dingq mwngz、boiqhab mwngz, yienghneix haujlai hong lajmbanj couh yungzheih guh lo. Danghnaeuz mwngz bingzseiz haemq noix gwn laeuj, hix aeu dauj di laeuj haeuj vanj bae, guh gij yienghceij “cingzeiq naek, ndoet gaemz ndeu”, bouxguhnaz rox mwngz mizsim couh ndaej lo, mbouj miz vunz aeu gaemh mwngz gwn daengz fiz bae. Danghnaeuz mwngz yawj mbouj hwnj bouxguhnaz, mbouj haengj caeuq gyoengqde guh baengzyoux, gyoengqde raen mwngz cungj gik swt mwngz, mwngz hozhawq siengj gwn gaemz raemx cungj mbouj ndaej!

“Saeh iq vunz lajmbanj, aeu sim bae guh cij baenz.” Gou roengz mbanj guhhong geij bi, roxnyinh ganbu roengz mbanj aeu miz cingz miz eiq, saedsaed caihcaih vih bouxguhnaz guh di saeh. Doengzseiz, ginggvaq guh hong lajmbanj le, gingniemh gou hix cugcienh lai, doiq gou ngoenzlaeng bae guhhong cungj miz yungh lai.