Youq ndaw yaenqsiengq gou, daxmeh cungj dwg bang gou saeg buh caemxndang, hongranz hix dwg de cienz bau. Hoeng, mboengqneix, daxmeh bienq “gik” lo.

Daj gou hwnj seiq nienzgaep hainduj, daxmeh couh bienq “gik” lo. Gou heuh daxmeh bang gou daek boi raemx he, daxmeh bingzseiz cungj naeuz caj yaep ndeu roxnaeuz ndei ha, hoeng seizneix de cix heuh gou gag guh; denz gwnz mbonq bingzseiz cungj dwg de baeb, daj seizneix hwnj cungj dwg gou gag baeb lo; daxmeh seizneix hix mbouj bang gou caemxndang lo, heuh gou gag caemx; mwh it、ngeih、sam nienzgaep, daxmeh haemhhaemh cungj son gou sij cozyez, sij sat le, lij bang gou genjcaz cozyez, bang gou sousib ndei daehsaw dem, seizneix daxmeh heuh gou gag naemj, gag genjcaz cozyez, gag sou daehsaw. Gij saeh baezlaeng, cungj dwg gou gag guh, daxmeh mbouj bang gou guh lo.

Gaxgonq, ngoenzsinghgiz daxboh daxmeh cungj youq ranz buenx gou. Hoeng ngoenzneix gyoengqde cix naeuz miz saeh okbae, mbouj ndaej ma ranz lo, lij heuh gou gag cawj haeux cawj byaek. Daxmeh naeuz: “Mwngz mbouj dwg gyaez gwn gyaeqgaeq cauj haeux ma? Ndaw binghsiengh miz gyaeq caeuq haeux, mboujnex mwngz cawj mienhdiuz gwn hix ndaej.” Gangj le song boux de couh okbae lo. Gou hozndat raixcaix naeuz: “Mbouj bang guh saeh couh suenq lo, lienz haeux hix mbouj bang gou cawj, vut gou bouxdog gag youq ranz, mboujgvaq hix ndei, ndaej yawj densi、loengh dennauj, gwn saej- daeuz.” Gou sien cienzbouh sij cozyez liux, youh yawj densi yaep ndeu, raen dungx iek lo, couh bae “sieng- saejdaeuz” yawj, baez yawj, “sieng- saejdaeuz” mbouj miz saek yiengh. Mbouj miz banhfap, gou cijndei bae ndaw fuengzdajcawj. Gouj siengj gij yiengh daxmeh baenzlawz cawj byaek gonq, caiq hag gij yiengh daxmeh cawj byaek. Gou sien dawz makyungz swiq seuq ronq ndei, yienzhaeuh daj ndaw binghsiengh dawz song aen gyaeq okdaeuj, caiq ronq ndei coeng caeuq hojduijcangz, doeklaeng dawz haeux okdaeuj. Gou hainduj cauj lo, gvaq yaep ndeu, gyaeq cauj haeux homfwdfwd couh cauj ndei lo. Gwn haeux sat le, gou ngamq hai densi, daxboh daxmeh couh dauqma lo. Gou hujdengdeng naeuz: “Sou baenzlawz vut gou boux dog gag youq ranz ne? Caiq gangj, sou mbouj dwg mbouj ma ranz ha?” Daxmeh cij riu mbouj han gou.

Doeklaeng, gou cij rox daxmeh dwg daegdaengq yienghneix guh. Laxlawz, daxmeh bienq “gik”, dwg vihliux hawj gou miz naengzlig gag guh saeh, gag rox gwndaenj.

(seiq nienzgaep Yauz Yinhdungz)