Gou aeu dawh nip nohbya cimz le song gaemz, gangj lauxsaed, nohbya de cawj gig haeusing, gyu youh mbouj gaeuq, baenzlawz beij meh gou cawj ndaej ndei? Hoeng gou vanzlij gig rox gvai haenh de:

“Ndeigwn, gij feih beij meh gou cawj ndei lai lo.”

“Lwgnyez hix rox yaeuh vunz lo.” De ndoet gaemz laeuj ndeu, aeu dawh vix gou doq riu doq naeuz:“Meh mwngz dwg bawx ndei mbanj raeuz haq okbae, maenh’ak youh gyaeundei, gou guh baenzlawz beij ndaej hwnj meh mwngz guh ne?”

Gou cij riu dwk, roxnyinh de mbouj gangjboq, gizsaed daxmeh gou ciengzseiz ndaej vunzmbanj haenh dahraix.

De gwn bya couh lumj gwn nohmou nei, hix mbouj lau ndokgangj, gaiq hung gaiq hung ndwnj roengz hoz, yaep he, vanj laeuj deng de ndoet caez lo.

“Mwngz gwn laeuj lumj gwn raemx nei.” Gou doeksaet gangj.

“Ngoenzneix seizheiq ndei, miz byaek ndei, nanz bungz ndaej.” De ndwn hwnjdaeuj biengj hai le farek ndau geij mbat nohngwz, ca di gyu cuengq roengzbae, dem di raemx, caiq dawz farek goemq ndei, dauqdaeuj raix rim vanj laeuj daihngeih, haenq ndoet le gaemz hung ndeu, ietiet dawh coh gou:“Gwn ha, nohngwz yaek cawj baenz lo.”

“Gou gwn bya.”

Siengj daengz haxbaenh de youq laj gofaex bok naeng duzngwz, gou ca mbouj geijlai lienz nohbya hix mbouj gamj gwn lo, nohbya haenx hix hausaksak, caeuq gij nohngwz gig lumj.

De youh gag gwn le dingzlai vanj laeuj, cij dawz aen rek cawj nohngwz hwnj gwnz daiz, gaiq hung gaiq hung nip gwn, gwn ndaej gig mizfeih.

Gou youh dwglau youh geizheih, naemj daengz duzngwz nod, yawj de gwn nohngwz, gou gaenq lumz buenx de naengh ndaej haujlai nanz lo.

Mwh de raix rim vanj laeuj daihsam seiz, sawqmwh fouz gyaeuj fouz rieng cam gou coenz ndeu:

“Daiq mwngz doiq mwngz baenzlawz gangj gou?”

“Mbouj…… De mbouj gangj maz gvaq ha!” Bak gou itseiz deng saek, mbouj rox baenzlawz han cijndei.

“Hei! Mwngz cungj mbouj miz ngwzheu caeuq ngwzraiz ganvad ba! Yaeuh ndaej bouxwnq hoeng cix yaeuh mbouj ndaej gou!”

Gou nyengh baez he, yawj gij yiengh feiz de, danghnaeuz de caen hozndat hwnjdaeuj, baez iet fwngz couh ndaej nyaenx dai gou lo!

“Daiq gou dandan gangj le aen goj ndeu ndwi, mbouj dwg——mbouj dwg gangj mwngz ne.”

“Goj? Maz goj?” De youh haenq ndoet gaemz laeuj ndeu, haep da cam gou.

“Mwngz rox gou ceiq maij dingq vunz gangj goj lo……”

“Gangj maz vahhoengq baenzlai, seizneix dwg gou aeu dingq mwngz gangj goj.”

Gou youq ndawsim buenzsuenq, danghnaeuz lauxsaed lwnh gij goj daiq gangj okdaeuj, de itdingh hozgaek, aiq lij fatbag hix gangj mbouj dingh, ndigah gou daegbied haeujsim nam.

(caengz sat)