Gyanghaet, Goengsam riuj doengj mok he bae gueng duz vaizmeh de, de doq cit ien babbab doq yawj vaiz gwn mok.

Siengj daengz yaep ndeu couh deng boux lauxbanj Gvangjdungh rag duz vaizmeh neix bae gaj, de nyaenx mbouj ndaej raemxda venj rim gvaengzda, aen naj hix saepsatsat.

Duz vaizmeh neix youq ranz Goengsam guhhong gaenq miz 8 bi lai lo, gaenx guhhong youh lauxsaed, moix bi lij cungj roengz duz vaizlwg he hawj de ciengx, ndawsim Goengsam angqvauvau, okrog haeuj ranz cungj haenh duz vaizmeh neix baenz.

Mbwn miz ngoenz ndit ngoenz fwn, daeglwg Goengsam youq ndaw singz dajgoeng, geij ngoenz gonq deng ci daemj ga raek lo, seizneix lij ninz youq gwn congzbingh ndaw yihyen ne.

Goengsam ngamq hwnj song caengz laeuz, ndaw fwngz mbouj lw geijlai ngaenz, daeglwg yw sieng aeu yungh ngaenz, gouq mingh youqgaenj, de mbouj ndaej mbouj haeb heuj gai duz vaizmeh simgyaez neix bae.

Haeux ndaw naz yaek hai va lo, ngoenzhaenx Goengsam bae gwnz haw cawx yw gaj non, de naemj cawx ndaej yw le, caiq bae yihyen yawj daeglwg.

Goengsam byaij haeuj aen diemq gai yw, dahlauxbanj gai yw riunyumnyum naeuz:“Goeng’au, aeu maz yw ha?”

“Aeu 10 gienh yw gaj non hawj gou.” Goengsam naeuz.

“Caemh 225 maenz, sou mwngz 220 maenz couh ndaej lo.” Dahlauxbanj doq cang yw hawj Goengsam doq naeuz.

Goengsam daj ndaw daehvaq mbon aeu 300 maenz ngaenz ndenq hawj dahlauxbanj. Dah- lauxbanj gaem ngaenz youq ndaw fwngz, fan bae fan dauq yawj geij baez le, riu naeuz:“Goeng’au, mbaw ngaenz neix mwngz vuenh lingh mbaw hawj gou ba.”

Goengsam ciep ngaenz gvaqdaeuj, yawj gwnz yawj laj, lumh bae lumh dauq, song da cengq hai gvangqlili, roxnyinh mbaw ngaenz neix caen miz di mbouj doxdoengz, de heiq hwnj digdig ndaq naeuz:“Duz lwgndai Gvangjdungh neix, gou dwg gaenj yungh ngaenz cij gai vaiz, siengj mbouj daengz sim de baenz nduk, aeu ngaenz gyaj daeuj yaeuh gou.”

Lauxbanj cawx vaiz youq Gvangjdungh liz baenz mbiengj mbwn he, Goengsam youh mbouj rox bae gyawz ra de, cijndei laepda haebnenggeng lo, caen dwg vunz baez boihseiz, gwn raemxsaw cungj saek hoz.

Goengsam fwngz he riuj daeh yw, fwngz he gaem mbaw bak maenz ngaenz gyaj haenx, sim fouz fangfang byaij youq gwnz haw. De naemj: Gawqyienz vunz ndaej yaeuh gou, gou couh dawz bae yungh, doxlawh gaem.”

Goengsam youq gwnz haw gvaengz bae gvaengz dauq byaij le geij hop, cungj naemj mbouj ok bae cawx maz doxgaiq. De dingz din ngiengxgyaeuj hwnjdaeuj, fwt yawjraen aen diemq Cunghgoz Densin, Goengsam cij siengj hwnj aen soujgih de mbouj miz vafei lo.

Goengsam yamq haeuj bakdou diemq Cunghgoz Densin bae, dahsau he riunyumnyum cam de:“Boh’au, yaek daeuj gyau vafei ha?”

“W, gou gyau bak maenz.” Goengsam naj saeksaengsaeng, sing iq naeuz.

Dahsau ciep gvaq mbaw ngaenz Goengsam, baez yawj, saeknaj de bienq ndaej fwt hau fwt henj, aj bak siengj gangj maz youh mbouj gamj gangj okdaeuj, vah daengz byai linx, youh ndwnj roengz dungx bae.

Dahsau dawz mbaw ngaenz haenx oet roengz ndaw gvih ngaenz bae, naj nding rwz hwngq, cengqgengz riu naeuz:“Boh’au, bang mwngz gyau ndei ngaenz lo, mwngz dauqbae ba.”

Goengsam gaemz heiq ndeu byaij ok bakdou diemq Cunghgoz Densin, gwnz mbaq lumj cuengq roengz diuz rap bak gaen naek nei, daengx ndang soengswdswd, aen sim cwxcaih haujlai.

Haetlaeng, Goengsam dwk yw naz ndei le, gipgip muengzmuengz bae yihyen yawj daeglwg. Goengsam hai dou haeuj ranzvunzbingh seiz, raen dahsau he naengh youq henz congz, cingq hawj daeglwg bwnq haeux.

Daeglwg raen Goengsam daeuj, naeuz:“Boh, mwngz daengz la?”

Dahsau dingqnyi, nyeuxgyaeuj dauqlaeng raen Goengsam, ndwn hwnjdaeuj, naj nding naeuz:“Boh’au, mwngz naengh.”

Goengsam raen naj dahsau, song da ndongq- liklik, de yawjyawj daeglwg caiq yawjyawj dahsau, fwt mingzbeg maz lo, sing gazngatngat naeuz:“Dahniq, mwngz dwg youq ndaw Cunghgoz Densin hwnjban ba? Ngoenzlwenz gou…… Ai, Gou doiq mbouj hwnj mwngz lo.”

Dahsau riunyumnyum naeuz:“Boh’au, mbouj miz maz, mwngz gaem caeuq gou gaem cungj doxdoengz.”

Daeglwg Goengsam mbouj rox songde gangj maz, geizheih cam:“Boh, sou gangj maz saeh ha? Sou gaxgonq raen gvaq?”

Goengsam byaij daengz henz congzbingh, riunyumnyum naeuz:“Lwg ha, mwngz miz fukheiq, gou miz fukheiq, ranz raeuz cungj miz fukheiq.”

Daeglwg Goengsam yawjyawj daxboh youh yawjyawj dahyoux, cij raen dahyoux najhai najriu, daxboh hix najhai najriu, de cix geizheih dangqmaz, mbouj rox fatseng maz saeh.