Beixmbauq naeuz de gyaez goleux, goleux youh sang youh hung.

Gou naeuz gou gyaez gonim, gonim sang caeuq gou doxlumj.

Beixmbauq riu gou naeuz: Huk lai! Mbouj miz ceiqheiq!

Gijmaz heuh guh mbouj miz ceiqheiq ne, gou mbouj rox.

Gou gyaez gonim. Gonim hai va seizde, gou bae gwnz bo liuh, gonim rim bo cungj angqfwngfwng vaeg baenz cumh baenz cumh va——angqcoux gou. Goleux couh guhlawz ne? Gou baezbaez byaij gvaq laj goleux ngiengx gyaeuj yaek yawjyawj dujva ndinghoengz de, de cungj mbouj leixlangh gou.

Gou gyaez gonim. Gonim mak cug le, gou bae gwnz bo liuh, gonim rim bo cungj angq- fwngfwng vad fwngz——couh lumj naeuz: Mak dou van lwi? Ndeigwn lwi? Ndeigwn couh caih mwngz mbaet bae gwn. Goleux couh guhlawz ne? Gou baezbaez byaij gvaq laj goleux ngiengx gyaeuj yaek yawjyawj gij mak gwn mbouj ndaej de, de cungj mbouj leixlangh gou.

Beixmbauq naeuz: Gonim youh daemq youh iq suenq gijmaz, goleux youh sang youh hung dwg faexak bw.

Goleux youh sang youh hung couh ak lai ha? Ngoenzde, laj bya mbouj dwg miz song go goleux youh sang youh hung de deng rumzlaux bongj boed, laemx youq gwnz namh ma? Hoeng gonim youh daemq youh iq rim gwnz bo de, mbouj miz saek go deng rumzlaux boedrag gvaq bw!

（Daj《Bonjsei Sim Lwgnyez》（Veiz Gizlinz raiz）senj okdaeuj, Lwgfwngzmeh/卢奋长 hoiz）