“Cozyez daiq lai lo!” Gyoengq doengzhag bouxboux cungj ienq naeuz, gou hix gyangznaek danqheiq.

Cuengqhag le, gou vaiqvet buet ma ranz. Mwh gou sij cozyez sat, gaenq gig gvaiz lo. Gou siengj: Sij baenzlai cozyez, wnggai ndaej yawj densi luba. Yienghneix gou couh hai densi yawj. Mwh gou cingq yawj haeujmaez, daxmeh byaij gvaqdaeuj lo, de najndaem najlaep doiq gou naeuz: “Vaiq di gven densi bae ninz, haetcog lij bae hag ne! Danghnaeuz caiq baenzneix roengzbae, couh yingjyangj hagsib bw!” Gou naeuz: “Sij baenz lai cozyez, couh mbouj ndaej yawj saek yaep densi ha?” “Seizneix geij diemj cung lo, vaiq bae ninz!” Ai, dingjgeng mbouj miz yungh, gou cijndei mbouj gamsim gven densi bae ninz lo.

Haet daihngeih hwnqdaeuj, cat heuj swiq naj sat le, gwn haeuxcaeux, gou raen gwnz daiz mbouj miz bingjgyaeqmanh gou maij gwn haenx. Gou maij gwn bingj neix lai lo, diuzmanh caeuq gienghhaeux、gyaeq- gaeq cien baenz bingjgyaeqmanh, gij feihdauh neix caen dwg gwnzmbwn nanz ra, lajbiengz noix miz ha, hawj vunz baez siengj hwnj couh myaiz rihroedroed. Daxmeh cix naeuz: “Diuzmanh dwg gijgwn nyapnyaj, doiq ndangdaej sienghaih lai. Yaek gaujsi lo, aeu lai haeujsim ndangdaej, gaej caiq gwn gij doxgaiq neix lo.” Ai, gou cijndei nyienghbouh, gwn vanj dang ndeu couh bae hagdangz lo.

Daengz hagdaengz le, lauxsae umj dab sigienj he haeuj gyausiz. Gyoengq doengzhag ienq naeuz: “Dai lo, youh yaek gaujsi. Lauxsae suyoz couh dwg rox caegguk, ai!”

Banngaiz cuengqhag ma daengz ranz, gou siengj: Cungjsuenq gaujsi sat lo, wnggai ndaej loengh dennauj yaep deu luba? Yienghneix, gou couh angqvauvau caeuq gobiuj doxcaez dwk dennauj youzhi. Cingq dwk ndaej angqfwngfwng, gou sawqmwh roxnyinh daengz raeblaeng miz maz mbouj deng. Gou baenq gyaeuj gvaqbae, raen daxmeh mbouj rox seizlawz gaenq ndwn youq raeblaeng gou lo. Cij raen de song fwngz cab hwet、 dacaengz da’mboet, hozndat dwk daengx gou, gou deng hwk dwk swenj sing “va” ndeu, sikhaek daj gwnz eij saet hwnjdaeuj! Daxmeh hozndat dwk naeuz:“Byawz hawj mwngz dwk youzhi ha? Vaiq gven dennauj bae, gijmaz seizhaeuh lo lij loengh dennauj! Danghnaeuz mwngz dawz cungj rengz neix yungh daeuj doegsaw, geijlai ndei ha!” Dingq daxmeh naeuz gou, gou ndawsim itbak aen mbouj fug, it cien aen mbouj nyienh’eiq—— Vihmaz dou lwgnyez couh mbouj ndaej dwk youzhi? Gou neix heuhguh “cuengq- mbin bonjfaenh”! Hoeng, youq baih- naj daxmeh, gou moix baez cungj “mbin” mbouj hwnjdaeuj, ai……

Haujlai vunzhung cungj nyinh- naeuz cujyau yinvu lwgnyez dwg hagsib. Neix dangyienz mbouj loek, hoeng gyoengqde lumzbae “gyaez guhcaemz” cij dwg diensingq dou. Doenggvaq gak cungj guhcaemz, ndaej hawj dou lwgnyez daiq daeuj yinx- daeuz lailai, hix hawj dou miz siengjfap geizgiuj, lij ndaej hoizsoeng gij atlig hagsib. Mwh wnggai hagsib couh hagsib, mwh wnggai guhcaemz couh guhcaemz, hagsib caeuq guh- caemz giethab, neix miz maz mbouj ndei ne? Vunzhung vihmaz itdingh fanjdoiq ne? Ai, daxboh daxmeh, aen seiqgyaiq dou sou mbouj rox.

(haj nienzgaep Lij Bozvwnz)