“Byawz gangj?” Gou liuh mbouj daengz de fwt ndwn hwnjdaeuj, song fwngz nyaenx song gen gou, haenqrengz ngauzauau, gij sing de nyanq lumj duzguk maenj:“Luenh gangj! Byawz gangj?”

Gou deng de hwk ndaej ca mbouj geijlai yaek daej lo, genfwngz deng de nyaenx ndaej gig in. Sawqmwh, de soeng fwngz lo, aen ndang lumj swhgvah deng mbaet roengzdaeuj cuengq haemh he nei, daengx aen unqnemnem cungj boep roengzbae lo.

Gou riuj hwnj aenlamz, lij doeksaet caengz simdingh, yaek byaij okbae, hoeng genfwngz youh deng gaemhdawz lo. Gij yiengh Aulungz- gveiz haxbaenh lumj bouxsien dawz- dou nei maenjgywdgywd fwt youh bienq yiengh lo, caeuq bingzciengz caeuq dou guhcaemz gangjriu dox- doengz. Gou caen mbouj rox de vihmaz yaep he angq yaep he huj, lumj baenzbag nei.

“Ah Byauh!” De gig doxndiep youh unqswnh dwk heuh aen coh gou, youh rag gou naengh youq aen eijfaex he, coux aen lamz ndaw fwngz gou gvaqbae baij youq gwnz gvih ciengx ngwz:“Caeuq gou gwn nohngwz gonq, yaep he couh cawj baenz lo.”

“Mbouj, gou mbouj gamj gwn.”

“Yienghneix couh gwn bya! Na!” De daj gwnz gaq dawz vanj hung cang nohbya cawj cug he, cuengq youq gwnz daiz iq, youh dawz song vanjdawh okdaeuj:“Mwngz gamj mbouj gamj gwn laeuj? Laeujhaeux cab laeujmaknganx, vanyetyet.”

Gou mbouj hawj de raix laeuj youq ndaw vanj gou, gij laeuj caiq van gou hix mbouj miz yinxdaeuz.

De mbouj raix hawj gou lo, cij raix ndaej aen vanj de rimradrad.

“Mbouj gwn laeuj couh gwn bya, yawjyawj nohbya gou cawj beij mbouj beij meh mwngz cawj ndaej lai ndei.”

(caengz sat)