“Mwngz bingzciengz bae gaemh duzngwz maz?”

“Ha, lai cungj lai yiengh!” De gig sim’angq, hix gig daekeiq geq naeuz:“Miz ngwzgyaeujbenj、ngwzyouqrungz、ngwzgyaeujhenj、ngwzraiz、ngwz- gyaeujbingz、ngwzsaigim、ngwz- boengzraiz、ngwzfaenzhab、ngwz- heu……”

“Mwngz deng mbouj deng duz- ngwz haeb gvaq?”

“Deng gvaq.”

“Yienghneix, mwngz baenzlawz mbouj dai ne?”

“Hei! Gou miz ywdoj!” De cienq ndang vixvix aen congz lajde:“Gizhaenx miz ywdoj yw deng duz- ngwz haeb.”

“Gvaiq mbouj ndaej mwngz mbouj lau duzngwz!”

“Baenzbaenz duzngwz bungz gou, suenq de boihseiz!”

“Danghnaeuz mbouj dwg mwngz gaemh duz ngwz ndaw mbanj caez, dou itdingh ciengz deng duzngwz haeb.”

“Cuengqsim, yienznaeuz mbouj gamj gangj gaemh caez lo, hoeng hix ca mbouj geijlai lo!”

“Aulungzgveiz.”Gou gamj- doengh naeuz:“Baenzneix vihmaz gyoengqvunz lij ndaq mwngz dwg vunzrwix ne? Gizsaed mwngz dwg boux vunzndei ha!”

De ngiengxgyaeuj yawj gou baez he, feiz ndaw cauq ingj ndaej faj naj de nding’yanyan, gou raen de roengz- rengz haepbak, song diuz bwnda co de ning le geij mbat, riumbw lwnh hawj gou:

“Vunzndei caeuq vunzrwix miz maz mbouj doxdoengz? Ah Byauh, aeu caenda yawjraen cij suenqsoq, haujlai vunzrwix deng luenh riuz baenz vunzndei, doxdoengz, hix mizmbangj vunzndei deng luenh riuz baenz vunzrwix, aen bak song caengz naeng, baenzbaenz gyoengqvunz maij baenz- lawz gangj couh baenzlawz gangj.”

“Daiq gou mbouj rox luenh gangj vah.” Gou miz di mbouj doengzeiq.

“Daiq mwngz? Haha……”

“Mwngz baenzlawz lo? Miz maz ndeiriu?”

Gij sing riu de fwt daengx roengzdaeuj, gou roxnyinh ndawranz gaenq saek rim gij hoenz, lumj daj ndaw bak de riu okdaeuj nei.

“Mbouj miz maz ndeiriu, gizsaed gou gaenq faen mbouj ok maz dwg riu maz dwg daej lo.”

De maeuq roengzbae beiz le geij mbat feiz, gij fwnz coemh ndaej engq hwng lo, hoenz hix noix haujlai lo.

Gou mbouj rox de gangj maz, cij vih de roxnyinh miz di vei, lumj de gyaxgedged boux dog he, bingzciengz cungj dwg de bang bouxwnq, hoeng lumjnaeuz bouxwnq coengzlaiz mbouj bang de gvaq, dauqfanj lij youq baih- laeng luenh gangj de dwg vunzrwix, naeuq de, mizseiz daiq gou hix naeuz de mbouj ndei.

“Aulungzgveiz, dingqgangj——” Gou mbouj gamj naeuz dwg dingq daiq gou gangj,“Dingqgangj mwngz lij coz seiz, hwnj bya gvaq……” (caengz sat)