Gaenq haujlai nanz mbouj ma ranzcoj lo, ngoenzciet cingmingz song ngoenz gonq, Daegngeih daj dienhvah daeuj, cam gou naeuz ndaej mbouj ndaejhoengq dauqbae baez ndeu, aeu doxyaeng bineix ciet cingmingz baenzlawz sauqmoh.

Gou han naeuz, miz maz saeh couh youq ndaw veizsinginz gangj ba. Daengz haemh le, geij beixnuengx couh youq ndaw veizsinginz lumj haihoih nei, daujlun haenqrem. Daih- gya cungj nyinhnaeuz bineix sauqmoh dou aeu banh nauhyied cij ndaej, ndaw mbanj gij ranz wnq cungj gaenq bwh ndei lo, dou hix mbouj ndaej doeklaeng lairaeuh.

Daegbied dwg dwen daengz yaek sauq aen moh daxboh seiz, cungj roxnyinh naeuz yaek aeu banh ndaej engq nauhyied, guh ndei le hawj daxboh baujyouh dou ndaej bingz- bingz an’an, gwndaenj hoenghhwd- hwd. Daxboh dou ndaej 8 bi couh baenz lwggyax lo, youq ndaw mbanj gwn haeux vunzlai majhung. Mwhde dou geij beixnuengx lij iq, daxboh bingh naek, ndawranz gig gungzhoj, mbouj miz cienz yw, doeklaeng couh liz dou bae lo. De daengx ciuh mbouj ndaej soeng saek ngoenz gvaq, daengz seizneix liz dou bae gaenq ndaej 20 geij bi lo, danghnaeuz bineix sauqmoh mbouj guh ndaej hoengh di, roxnyinh doiq mbouj gvaq de.

Ngoenz ciet cingmingz daengz lo, dou geij beixnuengx haetromh caeux- caeux couh nyaengqnyatnyat hwnj- daeuj, mbangj gaj mou gaj yiengz, mbangj gaj gaeq gaj bit, mbangj heh bya, gij noh bya noh gaeq, haeux- naengj haj saek, gak cungj gak yiengh byaek ndei cungj baij hwnjdaeuj lo. Lau daxboh dou youq lajyaem gvaq ndaej mbouj ndei, bae gwnz haw cawx ndaej haujlai doenghgij aeu ceij guh, lumjbaenz gyauceh、cinwngz soujgih、buhvaq gyaeundei caeuq mbong gyahden, lienz gij ceijcienz gyaeujmoh daxboh hix guh ndaej hoengzhoengz loegloeg. Lij cingj song goengdauh daeuj hawj daxboh guhmo, gij singbauq hongzhoho mbouj dingz, sing loxlez boqdapdap. Gyoengq vunz ndaw mbanj yawjraen le cungj naeuz：“Lwglan ranz neix seizneix miz ngaenz lo, nyienh hauqswnh bouxlaux lo.”

Daengz gyanghaemh baez gyoeb- suenq, ngoenzde cienzyungh sauqmoh sai bae 3 fanh lai maenz, gij hab gwn gwn mbouj liux, naeuz gueng mou, mbouj miz mou, gueng ma, mbouj miz ma, lw baenz rwd baenz langh, ienva bauqrengh cuengq bae le geij loz, hoeng daihgya cungj nyinhnaeuz daxboh ngoenzneix itdingh roxnyinh vuenyungz dangqmaz.

Nyaengqfoedfoed ngoenz ndeu, haemhde daihgya cungj gig baeg, ninz ndaej ndaekndende.

Haemhde youq ndaw fangz- hwnzloq, daxboh naeuz gou:“Gij saeh sou ngoenzneix guh, gou cungj yawjraen lo. Hoeng, gou mbouj ngah gwn law, gyauceh gou mbouj rox hai, aen cinwngz soujgih gou mbouj rox yungh, cawx buhvaq gyaeundei gou mbouj maij daenj, coemh ceijcienz baenzlai gou hix yungh mbouj sat, caemhcaiq sing bauqrengh sing loxlez yiengj ndaej rwz gou mbouj cwxcaih.”

Gou naeuz:“Boh ha, gaxgonq mwngz gwnhoj lai la, ngoenzneix dou bouj hawj mwngz, vunz ndaw mbanj cungj haenh naeuz dou roxsoq, hauq- swnh ne.”

Daxboh caem yaep ndeu naeuz:“Hauqswnh ndaek roet, caen dwg saiyaix, vunz dai le lij rox maz dem, seizneix ceiq hawj gou cuengq mbouj roengz dauqfanj dwg daxmeh sou. Daxmeh sou caeuq gou baenzranz gwnz haemz baenz ciuhvunz ndeu, seizneix de gaenq geq lo, ndangdaej mbouj ndei geijlai, gangj vah hix lai, sou gaej yiemz de raemh. Sou aeu lai dauqma yawjyawj de, buenx de lai gangj di vah, de laux lo, hix mbouj ndaej caeuq sou caez youq geijlai bi lo, bingzciengz miz bya miz noh yaek hawj de lai gwn di. Lij miz mboengqneix lwgda de lumj baenz damueg lo, sou ndaejhoengq daiq de bae yihyen yawj baez he, hix mbouj yungh geijlai cienz. Gij cienz ngoenz- neix sai haenx gaeuq daiq daxmeh sou bae yw bingh geijlai baez lo.” Doxboh gangj le, danq gaemz heiq he, cienq ndang couh lizbae lo.

“Daxboh, mwngz gaej bae!” Gou heuh sing hung he, daj ndaw fangzhwnzloq singj gvaqdaeuj. Mwhde, gou cij ndaejgeiq, daxmeh mboengq- gonq gaenq geij baez caeuq gou dwen gvaq, lwgda de aiq deng damueg lo, siengj bae yihyen hung yawjyawj. Hoeng, dou geij beixnuengx doxyaeng le cungj naeuz ndaw daeh mbouj miz ngaenz, hix mbouj miz seizgan, gvaqlaeng caiq menh gangj ba.

Siengj daengz ngoenzneix sauq- moh sai bae baenzlai ngaenz, siengj daengz byoemgyaeuj hausaksak daxmeh, byaij loh vaijdedded, hwet hix gaeuz lo, siengj daengz bingzseiz ra gyaij mbouj nyienh dauq ranzmbanj yawj daxmeh, gou yied siengj yied najmong. Uengj’feiq geij beixnuengx dou okrog doegsaw roxnaeuz guhhong baenzlai bi, gij dauhleix rox mbouj noix caemhcaiq gij saeh hix bungz mbouj noix, hauqswnh daxmeh cungj guh mbouj daengz gizcaen, baenz maz vunz dem? Daengz ngoenzcog aeu caeuq geij beixnuengx naeuznaeuz gij saeh neix cij ndaej.