Miz ngoenz ndeu, banringz mbwn gvengqyauyau, Siujmingz sij cozyez sat le, de angqvauvau, fwngz gaem aen makgyoij he, mienh gwn mienh byaij ok rog bae ra doengzdoih guhcaemz.

Mwhde, Siujhoengz cingq youj bat raemx ndeu byaij youq baihlaeng Siujmingz. Siujmingz gwn makgyoij sat le couh swnh fwngz baez gveng, naeng makgyoij couh gveng youq gwnz dieg baihlaeng de. Siujhoengz mbouj haeujsim caij deng naeng makgyoij, conj laemx lo, lienz bat daiq raemx mbin daengz gwnz gyaeuj Siujmingz bae, Siujmingz daengx ndang cungj deng rwed dumz, baenz duz “gaeqdoekraemx” lo……

Siujhoengz goq mbouj ndaej yawj swhgeij deng mbouj deng sieng, gipmuengz ndwn hwnj naeuz: “Doiq mbouj hwnj! Gou mbouj dwg daegdaengq law.” Siujmingz naeuz: “Mbouj law, dwg gou loek lo!” Siujhoengz ngeizvaeg cam: “Vihmaz ha?” Siujmingz naeuz: “Dwg gou luenh vut naeng makgyoij, mwngz cij deng laemx hane.” Gangj le, Siujmingz gungj ndang gip aeu naengmak, cuengq haeuj doengj- nyapnyaj bae. Siujhoengz yaengx mehfwngz coh Siujmingz naeuz: “Mwngz caen dwg boux lwgnyez ndei rox loek couh gaij he.”

Siujmingz gaeugaeu laeng gyaeuj, mbouj eiqseiq naeuz: “Gou baezlaeng caiq hix mbouj luenh vut naengmak lo.”

Gangj le, song boux de angqfwngfwng doxcaez ma ranz lo.

(ngeih nienzgaep Bwz Beizgiz)