Gou daengx youq baihnaj ranzdaemq de, mbouj gamj caeuq de byaij haeujbae.

De ngaemgyaeuj byaij haeuj ndawranz, lij caeuq gou gangj vah:

“Baenzneix gou aeu gyo’mbaiq daiq mwngz lo, mwngz naengh yaep he, gou cawj nohngwz hawj mwngz cimzcimz, mbei ngwz mbouj gamj gwn, nohngwz wnggai gamj gwn ba? ——Yi, Ah Byauh, haeujdaeuj ha, ndwn youq baihrog guh maz?”

“Gou mbouj gamj!” Aenvih doenghbaez dou daengz miuhsaenz- vangz daeuj guhcaemz, cijaeu byaij gyawj ranz de, de couh lumj duz ma yak nei raeuq hwnjdaeuj, lumj giemxdou ranzdaemq de haem miz dileiz nei, hwk ndaej dou byawz hix mbouj gamj caiq byaij gyawj lo.

“Mbouj lau, gou youq ne!” De youq ndawranz heuh.

Gou cijndei siujsim riri yamq gvaq giemxdou.

Ndaw ranzdaemq mbouj rongh geijlai, caiq gangj seizneix yaek fuemx, gou baez haeuj ndaw, ceng mbouj geijlai yawj mbouj raen yiengh doxgaiq lawz, ndigah hix mbouj gamj seizbienh yamqdin.

“Daeuj. Naengh baihneix.”

“Myox lai lo!”

“Yaep he couh roxnyinh rongh lo!”

Dahraix, gou couh menhmenh yawj ndaej raen lo, Aulungzgveiz cingq maeuq youq henz aen doengj- raemx ronq nohngwz.

Gou dawz gaiq gau ndaw lamz caeuq song geu buhvaq okdaeuj cuengq youq gwnz congz iq, doeklaeng byaij daengz baihlaeng de yawj de guh.

De dawz gyaeuj caeuq rieng duzngwz raemj bae caez, cij lw duenh cungqgyang miz noh haenx, aeu fagcax ronq baenz gaet baenz gaet, vut haeuj ndaw rek iq he.

Gou ndwn youq henz gvih lumj aen ringj iq, de sawqmwh iet fwngz dumzdwddwd rag gou baez he, heuh gou liz aen gvih haenx gyae di.

“Guh maz?”

Gou ngaemgyaeuj yawj le aen gvih baez he, aen gvih haenx couh lumj aen ringj, mboujgvaq miz baih ndeu dwg aeu muengxdietsienq humx dwk, gou siengj cimcim ndawde coq miz maz doxgaiq, hojsik laep lai, maz hix yawj mbouj raen, cij roxnyinh miz geu heiqhaeusing he cigsoh roemx haeuj ndaw ndaeng daeuj.

“Mwngz mbouj dwg gig lau duzngwz ha?”

“Baenzneix gangj—— gizneix cang miz duzngwz?”

“W, cungj dwg duzngwz ceiq doeg.” De hainduj youq ndaw cauq iq caux feiz.

“Ai!” Gou doq liz aen gvih haenx gig gyae cam:“Duzngwz mwngz ciengx hane?”

“W.”

“Rox haeb vunz?”

“Rox, baez deng haeb couh yaek dai!”

Gou simdiuq dwk caiq baenq gyaeuj yawj aen gvih haenx, doeksaet cam:

“Yienghneix, mwngz lij ciengx gyoengqde guh maz?”

“Gwn ha! Duzngwz yied doeg yied ndaej bouj ndangdaej!”

“Haxbaenh duzngwz deng bok naeng haenx dwg mbouj dwg ngwz- doeg?”

“Mbouj dwg, dwg duz nuem iq.” De beiz feiz naeuz:“Danghnaeuz dwg ngwzdoeg, gou couh sij mbouj ndaej gaj de lo.”(caengz sat)