De naemj bae naemj dauq, couh daiq Daegmauj bae henz vaengz youz. Daegdog doiq Daegmauj naeuz:“Lauxdoengz, cawbauj mwngz gouq le diuz mingh gou, gou baenzciuh cungj gyo’mbaiq mwngz. Seizneix, gou siengj caiq yawj naed cawbauj baez ndeu!” Daegmauj raen Daegdog yienghneix gangj, couh mbon naed cawbauj okdaeuj hawj Daegdog yawj. Daegdog coux gvaq naed cawbauj ronghsagsag neix, yied yawj yied sim- angq. Sawqmwh, de haenqrengz nyoengx Daegmauj mbat ndeu. “A——” sing ndeu, Daegmauj couh deng nyoengx roengz laj vaengz bae lo.

Daegdog gag vuenheij, yo ndei naed cawbauj ganjgip maranz. Meh de cam:“Lauxdoengz Daegmauj mwngz ne?” Daegdog cangguh siengsim dap naeuz:“De gaenq bae dieg wnq lo.” Haet daihngeih, de couh caegcaeg hwnj roen bae gingsingz.

Dauq gangj Daegmauj deng Daegdog nyoengx roengzbae, hoeng doek daengz benq dan henz vaengz, deng sieng cix caengz dai. Hoeng seiqhenz dat lingqlangq, baenzlawz bin ndaej hwnjbae ne, henzgyawj hix mbouj miz gijgwn, cij ndaej caj dai ndwi lo. De danq naeuz:“Ai, simndei gouq vunz, dauq deng vunz haih, mehmbwn na!”

Dingjlingz, Daegmauj deng nyoengx roengz laj vaengz seiz, duzromh Daegmauj gaxgonq gouq yawjraen lo, de youq byonghmbwn doetsaet hemq sing ndeu, doq mbin roengz laj vaengz bae yawj miz maz saeh. Yienzhaeuh de youh mbin hwnjdaeuj, bae lwnh hawj duzdoq Daegmauj gaxgonq gouq. Duzdoq Daegmauj gaxgonq gouq ndaej rox aen siusik mbouj ndei neix, doq lwnh duzngwz hau、duzmoed、duzroegenq caeuq duzsaehaexma daengj doengh- duz Daegmauj gaxgonq gouq. Yaep ndeu, gyoengqde couh comz youq itheij lo. Duzromh naeuz:“Gou soengq gijgwn hawj aenvunz.” Duz- saehaexma、duzmoed naeuz:“Dou soengq yw.” Duzngwz hau naeuz:“Gou bae ram aenvunz hwnjdaeuj.” Gangj sat, gyoengqde couh gag nyaengq bae bang Daegmauj lo. Duzngwz hau heuh beixnuengx de daeuj, baenz cien baenz fanh duzngwz raih daengz henz dan, caengz dem caengz, sai le song ngoenz song hwnz, dauqdaej dawz Daegmauj ram hwnjdaeuj lo. Daeg- mauj ndaej gouq le, gyo’mbaiq gyoengq doenghduz bang de.

Daegmauj ndaej rox Doegdog gag dawz cawbauj bae gingsingz, hozgaek dangqmaz. Duzdoq、duzngwz hau buenx de gipmuengz ganj bae ging- singz.

Byawz rox, Doegdog sien daengz gingsingz, caeux couh dawz cawbauj soengq hawj vuengzdaeq, gaenq ndaej guh hak hung lo. Daegmauj gauq Doegdog, youq dangqnaj vuengzdaeq, cij raen Doegdog fanj bak naeuz:“Lwgcaeg Daegmauj, gyajmauh vunz- doegsaw yaek daeuj gingsingz gaujsi, daegdaengq bae ranznden gou youq, byonghhwnz gawqyienz ndonj haeuj ranz gou daeuj caeg cawbauj, caeklaiq miz vunz fatyienh, ciengj cawbauj dauqma……”Doegdog bak gvai cang lauxsaed, caih Daegmauj baenzlawz gangj vuengzdaeq hix mbouj saenq.

Doeklaeng vuengzdaeq fokdeng- deng couh heuh vunz daeuj moeb Daegmauj. Cingqngamj Daegmauj heuh “ien’uengj” seiz, sawqmwh miz vunz daeuj bauq: Bingmax henz guek hoenx gvaqdaeuj lo, dangqnaj couh yaek hoenx daengz gingsingz lo. Youq mwh youqgaenj neix, vuengzdaeq roengzlingh heuh gak boux cienggun daiq bing bae dingj vunzdig. Hoeng, bang cienggun cungj lau deng hoenx baih, byawz hix mbouj gamj ok sing. Daegmauj dauq hemq hwnjdaeuj:“Hawj gou bae ba!”

Daegmauj buet ok gingsingz, cij raen vunzdig gaenq gyawj henz gingsingz lo. Mwhneix, Daegmauj sikhaek heuh duzromh、duzdoq、duzngwz hau gvaqdaeuj. Yaep he, gwnzmbwn duzromh、 duzdoq rim ndaej laepcubcub, gyoengqde baez dot baez ndat, cienmonz camx gij lwgda vunzdig. Gwnznamh duzngwz raih seiqlengq, gyoengqde geuj ga max vunzdig, hawj gyoengq max cungj daengx roengzdaeuj. Vunzdig hemq dai hemq lix, baenzlawz hoenx ndaej baenz dem.

Daegmauj ndaej hoenx hingz, vuengzdaeq sikhaek couh cam de:“Mwngz mbouj yungh cungq cax hix hoenx ndaej hingz, gyoengq doengh- duz vihmaz dingq gij vah mwngz bae hoenx vunzdig ne?” Daegmauj couh dawz duz gungqsou haiz soengq naed cawbauj caeuq gij saeh daeuj gingsingz gwnz roen fatseng ciengz- saeq gangj okdaeuj, vuengzdaeq dingq ndaej deihdeih ndaekgyaeuj. Daegdog hix ndwn youq henz, naj de yaep ndeu heu, yaep ndeu hau, lau ndaej saenzdwddwd, hoeng de euq de mbouj haih Daegmauj gvaq. Daegmauj cij ndaej heuh duzdoq daeuj guhcingq, duzdoq baez raen Daegdog, roxnyinh de mbouj miz aensim, sikhaek couh coemj gvaqbae, haenq ndat hoz de, de couh deng doeg dai lo. Baenzneix, vuengzdaeq engqgya saenq gij vah Daegmauj lo

Gvaqlaeng, Daegmauj bae gaujsi, gauj ndaej canghyienz lo. Vuengzdaeq nyinhnaeuz de gig miz dungxcaiz caemhcaiq simndei simsienh, hawj de guh hak hung.

Daegmauj ndaej louz youq gingsingz, hoeng de mbouj lumz beixnuengx gungqsou, sikhaek gwih max maranz, roq laz roq gyong, coux gungqsou daeuj gingsingz caez youq.(sat)