Aulungzgveiz sawqmwh daengx fwngz roengzdaeuj, cienq gyaeuj yawj gou.

Gou foengx ndaej doiqdauq yamq ndeu, lau de heuh gou bang de gaem diuz rieng duzngwz roxnaeuz guh gijwnq.

“Mwngz gamj mbouj gamj ndwnj mbei duzngwz?” De dawz benqbohliz hamz youq bak roengzdaeuj, gig nyinhcaen cam gou.

“Gaej gangjriu! Aulungzgveiz.” Gou rox de ciengzseiz gangjriu hwk bang lwgnyez dou.

“Byawz caeuq mwngz gangjriu?” De baenq gyaeuj dauqbae yaek mbon giz dungx duzngwz. Gou yawjraen naed giuz iq saekloeg deng de aeu benqbohliz gvej roengzdaeuj, lwgfwngz nep danq:“Mbei duzngwz, gij huq ndei ne!”

“Ai, gou mbouj gwn!” Gou gig lau, gwq vad fwngz dwddwd.

“Lwgnyez ngawz ndeu!” De yaek oet aen mbei duzngwz haeuj ndaw bak gou, hwk ndaej gou ca mbouj geijlai vut aen lamz ndaw fwngz couh buetdeuz lo.

Aulungzgveiz riuriu, suk fwngz dauqbae, coq haeuj ndaw bak bonj- faenh, aen hoz baez ngiengx, aen bak baez haep, lumj ndwnj gaemz myaiz he nei, aen mbei duzngwz saekloeg haenx couh deng de ndwnj haeuj ndaw dungx bae lo.

Duzngwz deng venj youq gwnz ngafaex, de deng bok le gaet naeng lij niujgoz bibuengq dwk.

Gou ngawh ndwn youq gizde, yaek rueg okdaeuj lo.

“Mbei duzngwz dwg gij huq ndei, danghnaeuz dwg bouxwnq, gou lij sij mbouj ndaej hawj de gwn ne!” Aulungzgveiz raen gou deng hwk ndaej naj haunyo, doq riu dwk nai gou:

“Gaej lau, mwngz mbouj gamj gwn, gou couh gag gwn, gij ndeicawq mbei duzngwz lai raeuh! Lai gwn le seizhah couh mbouj rox hwnj baez hwnj bitfiengj, caemhcaiq doiq gij lwgda gig ndei, mwngz gwn ndaej bak aen mbei duzngwz le, couh ndaej youq ndaw laep yawjraen doxgaiq, cehda lij rox fat gij rongh saekheu.”

“Dahraix?” Gou da daengx cim- yawj de.

De laebdaeb bok naeng ngwz lumj duet mad nei, duzngwz mongraiz menhmenh bienqbaenz le diuz noh hau, naeng ngwz cungj deng bok roengzdaeuj seiz, ngwz lij loh nodniuj, ndik lwed hoengzfwg he swnh rieng lae roengzdaeuj.

Aulungzgveiz venj naeng ngwz youq gwnz nga, duzngwz menhmenh mbouj ning lo, doeklaeng Aulungz- gveiz dawz de roengzdaeuj, doiq gou riu naeuz:

“Haemhneix gou miz byaek ndei gwn bw!”

“Gwn duzngwz neix?”

“W! Lij miz duzbya hung ndeu dem.”

Gou riuj aenlamz riengz de byaij, ndaejgeiq ngoenzneix de youq henz dah gaenq camx ndaej duz bya he.

“Mwngz gvaq ndaej cwxcaih ha!”

“Hei! Ndaej gwn laeuj cij cwx- caih ne!”

“Miz nohngwz, miz nohbya, it- dingh aeu miz laeuj?”

“Deng! Miz byaek ndei wnggai miz laeuj ndei dem, gou gaenq cawx ce lo.”

“Aulungzgveiz, daiq gou lij heuh gou soengq gaiq gau he hawj mwngz ne!”

“Caen lwi? Youq gyawz?”

“Youq ndaw lamz neix.” Gou baez riuj aenlamz hwnjdaeuj:“Lij miz song geu buhvaq dem.”

“Hix soengq hawj gou?”

“W!”(caengz sat)