Gaxgonq miz daegmbauq simsoh caemhcaiq lauxsaed ndeu, heuhguh Daegmauj. Mehlaeng de doiq de mbouj ndei, gwn daenj mbouj beij bouxwnq, de gig roengzrengz doeg- saw, vunz ndaw mbanj byawz miz maz saeh, de hix caenhrengz bae bang.

Ngoenz ndeu, Daegmauj aeu fwnz dauqma, youq henz loh sawqmwh ndaejdingq gij sing yiengj “gwh——gwh——”. De baez yawj, yienzlaiz dwg duz gungqsou ndeu deng ndaek rin hung nap lo. De geuh ndaek rin bae, gouq ok duz gungqsou. Gungqsou ga ndeu deng nap bej lo, in ndaej lae raemxda, lij youq gizhaenx gyangz mbouj dingz, cojgvaq dangqmaz. Daegmauj naeuz:“Gungqsou, gungq- sou, mwngz gaej daej, gou yw ndei gij sieng mwngz.” Gangj sat, de couh dawz duz gungqsou cuengq haeuj ndaw daehvaq daiq ma ranz. De laebdaeb geij ngoenz hawj gungqsou oep ywdoj, dauqdaej yw duz gungqsou neix ndei lo. Daegmauj moix ngoenz bae hag roxnaeuz aeu fwnz maranz, cungj gaeb non lix daeuj gueng gungqsou. Gyanghwnz seiz, duz gungqsou couh maeuq youq henz daiz, gaeb gwn duznyungz, hawj Daegmauj ndaej anyienz youq laj daeng doegsaw. Daj neix hwnj, gungqsou caeuq Daegmauj couh gapbaenz le laux- doengz, Daegmauj heuh gungqsou guh daegnuengx, gungqsou heuh Daeg- mauj guh daegbeix.

Ronghndwen luenz le youh benj, benj le youh luenz, mbawfaex loenq le youh maj, maj le youh loenq. Yaepyet, Daegmauj mbouj rox mbouj nyinh hix doeg ndaej geij bi saw lo. Bineix, de yaek bae gingsingz camgya gaujsi. Hwnjroen gaxgonq, Daegmauj gig sij mbouj ndaej caeuq gungqsou swz naeuz:“Daegnuengx gungqsou, gou couh yaek hwnjroen lo, gou bae le, mbouj ndaej goq mwngz, mwngz aeu gag youq ranz lo, caj gou dauqma caiq doxcomz ba!” Duz gungqsou hix da nding naeuz:“Muengh mwngz youq gwnz loh bingzan, gauj ndaej hwnj le caeuxdi dauqma!” Gangj sat, de daj gyangbak haiz ok naed caw rongh- sagsag ndeu, soengq hawj Daegmauj:“Daegbeix, gou mbouj miz gim ngaenz hawj mwngz guh cienzroen, mwngz couh daiq naed cawbauj neix youq gwnz ndang. Naed cawbauj neix ndaej gouq mingh hix ndaej hoh ndang, dijbauj dangqmaz, gou cungj mbouj sij ndaej yungh, mwngz ciengeiz mbouj ndaej dawz doek bae bw!” Daegmauj ngaekngaek gyaeuj.

Daegmauj byaij le 30 leix loh, youq gwnz Bocazyouz raen miz duz romh he ninz youq henz loh, lumj ngamq dai bae mbouj geij nanz. Daegmauj gig cojgvaq de, siengj daengz gij vah gungqsou, couh dawz naed cawbauj cuengq youq gwnz ndang duzromh bae. Yaep he, duz- romh couh menhmenh singj gvaqdaeuj lo, ciepdwk de mbehai doiq fwed, mbin hwnj gwnzmbwn bae, youq dingj gyaeuj Daegmauj mbin bae mbin dauq, gyo’mbaiq Daegmauj.

Daegmauj byaij gvaq aen geng raez miz saek 90 leix, youq laj gofaex ndeu, raen miz gyoengq doq ndeu ninz youq gwnznamh. De byaij gyawj baez yawj, gyoengqde cungj dai caez lo. Daegmauj cojgvaq gyoengqde, youh dawz naed cawbauj cuengq youq gyang gyoengq doq bae. Gvaq yaep ndeu, gyoengq doq cungj lix gvaq- daeuj lo, humx Daegmauj mbinfwfw.

Daegmauj youh laebdaeb coh naj byaij miz saek 81 leix loh, bungz duzngwz hau ndeu dai le vang youq gyaeuj giuz, de youh simndei dawz naed cawbauj okdaeuj gouq duzngwz neix.

Daegmauj byaij ha byaij, itloh gouq le duzmoed、duzroegenq caeuq duzsaehaexma daengj doenghduz.

Ngoenz ndeu banhaemh, Daeg- mauj haeuj aen diemqhek ndeu bae doz, ngamq gwn caeuz gvaq, sawqmwh ranznden cienz daeuj gij sing daej- ngu’ngu. De couh cam bouxcawjranz:“Daxsimj ha, ranznden ok maz saeh la?” Mehsimj han naeuz:“Ranznden miz lwg dog ndeu heuhguh Daegdog, nienzgeij caeuq mwngz ca mbouj geijlai, de baenz binghgip dai bae lo.” Daegmauj dingq le gaenjgip bae daengz ranz haenx, dawz ok naed cawbauj cuengq youq najaek Daeg- dog. Mbouj daengz aen cungdaeuz, Daegdog couh menhmenh dauqndiu lo. Ranz Daegdog sing daej bienq- baenz sing riu, daengx ranz vunz cungj gyo’mbaiq Daegmauj dwg vunzaen. Bohmeh Daegdog mbouj rox baenz- lawz bauqdap Daegmauj, couh louz Daegmauj youq ndawranz youq geij ngoenz, moix ngoenz gaj gaeq gaj bit dakdaih, caemhcaiq heuh Daegdog caeuq Daegmauj gapbaenz lauxdoengz.

Daegdog ndaej naed cawbauj gouq dauq, bingh hix ndei lo. Ngoenzneix, de yaek bae rog guh- caemz. Daegmauj naeuz:“Laux- doengz, raeuz doxcaez bae gingsingz gaujsi ba!” Daegdog mbouj han, de mbouj siengj bae gaujsi. Ndawsim de dan naemj: Hei, lij dwg naed cawbauj lauxdoengz ndei! Danghnaeuz aeu gvaqdaeuj, bae gingsingz soengq hawj vuengzdaeq, mbouj rox beij gauj ndaej canghyienz ndei geijlai!

(caengz sat)