Dwg bouxlawz youq gwnzmbwn aeu aensetraemx hungloet baenzneix, set raemx hawj banringz oemndat neix dajcaemx ne?

Ndoengfaex ndaej caemxndang gvaq de, ndaundeiq heuswdswd venj rim gwnz gofaex .

Ndoibya ndaej caemxndang gvaq de, go’nywj naiqniekniek de, youh lumj haetromh seizde angqvauvau dawz ok baenz naed baenz naed raemxraiz ronghmyabmyab.

Nditndat de, ndaej caemxndang gvaq le couh lai ronghsag, lai liengz lai lo.

Singheuh duzbid hawj vunz simnyap de, caemxndang gvaq le cix lai swnhrwz lai ndeidingq lo.

Rumzoem ndoj youq ndaw lueg de, caemxndang gvaq le couh angqvauvau buet gwnz buet laj, daiq heiqhom dujva caeuq rumnya daeuj.

Singfwen siliengz roegfek ndaw ndoengfaex de, caemxndang gvaq le goj bienq angqfaengz lo.

Duj fwjndaem gwnzmbwn de, goj swiq ndaej hausaksak lo.

（Daj《Bonjsei Sim Lwgnyez》（Veiz Gizlinz raiz）senj okdaeuj, Lwgfwngzmeh/卢奋长 hoiz）