Gou miz boux dahcej ndeu, ngoenzneix gou couh daeuj ndeindei gangjgangj de.

Doenghbaez de dwggyaez dangqmaz, maj ndaej hix ndeiyawj. Hoeng——doeklaeng de ciengzgeiz mbouj baujhoh ndei swhgeij, seizneix de yakyawj dangqmaz! Gou geq gvaq, naj de miz 236 naed caeuz, gou hix ndaej yawj heuj de gvaq, heuj de lumj baenz naed baenz naed bohliz henjriri nei!

Singq de yak raixcaix, ngoenznaengz mbouj dwg ndaq gou couhdwg moeb gou, danghnaeuz fatheiq hwnjdaeuj, couh doiq gou youh ndaq youh moeb. Gou miz seiz hix hozgaek dingjbuek de, de cix riunyaen naeuz:“Ceiqnoix gou mbouj moeb dai mwngz ba.”

De cungj ngah caeuq gou doxeuq. Geiq ndaej miz baez ndeu, gou yawjraen ndaw binghsiengh ngamq miz aen binghgizlinz ndeu, couh naemj:“Ngamq miz aen ndeu lo, dahcej haengjdingh nyiengh hawj gou gwn loba.”Byawz rox gou ngamq hai dou binghsiengh, dahcej couh fatyienh lo. Sikhaek, gou gingqyienz youq seizhah ngoenz aeng neix, roxnyinh daengz genga hwnj naenggaeq, saenlaeng hix ok hanhheu liux. Gou gaenq rox de siengj guh gijmaz lo, cij raen de lwgda ronghrik, aennaj riunyaen, lumj raq rumz nei bonghmbin gvaqdaeuj ciengj aeu binghgizlinz. Caj gou fanjwngq gvaqdaeuj, de caeux gwn roengz dungx bae lo. De lij angqvauvau naeuz: “Ndei gwn!Caen ndei gwn!” Gou rox de mbouj dwg dam gwn, de dwg cienmonz caeuq gou doxeuq doxdingj.

Gou mbouj leix de, dajsuenq yawj densi yaep ndeu soengheiq. Gou naenx daiz 51, hoeng de sikhaek vuenh baenz daiz 15……Ai, caen dwg boux ak doxdingj ha.

Dahcej couhdwg boux“dwgcaengz” yienghneix ndeu. Hoeng, dangh- naeuz dahcej mbouj youq ranz, gou dwg mbouj dwg mbwq lai ne?

(Sung Swhcwz sij Ouh Caijfangh hoiz)