Gyoengqde doiqlaeng foedfoed, cungj lau gou.

“Sou lij miz damj mbouj miz? Caenh rox buetdeuz.”

Gou laebdaeb hat.

“Dawz vaq hawj gou!” Aulungz- gveiz hemq.

Gou nyengh baez ndeu, baenz- lawz gamj byaij gyawj de? Hoeng haxbaenh ngamq youq dangqnaj Ah Gunh gyoengqde baenzneix gangj, cungj mbouj ndaej sikhaek yienh’ok gij yiengh lau okdaeuj ha, gou anj lo.

“Ah Byauh, vut vaq gvaqdaeuj!”

Aulungzveiz caen rox ndawsim gou ngeix maz, hawj gou nyienghnaj. Gou sikhaek roengzrengz vut gvaqbae, de aeu fwngzswix coux gvaq geu vaq gou vut, youh cam coenz ndeu:

“Cug maenh caengz?”

“Haengjdingh lo!”

Duz ngwz hung fwngzgvaz de cadawz seizneix gaenq unqnemnem lumj gogaeu nei, aenbak baez haep baez hai, gungj mbouj ndaej ndang, lumj gaenq gyaed le. Ndigah mbouj sai geijlai nanz, couh deng Aulungzveiz oet roengz ndaw gavaq bae, doeklaeng de cug maenh gyaeujvaq, duz ngwz hung youq ndaw vaq nod, saek rim le gyaeujvaq caeuq song diuz gavaq.

“Gyo’mbaiq sou lo! Ngoenzcog gou cingqngamj aeu haeuj singz bae, duz ngwz neix caen mbouj iq.” De dwgrengz riuj hwnj gwed youq gwnz mbaq, hanh conh rim gyaeuj lo.

“Itdingh gai ndaej lai ngaenz lo.”

Raen gwnz mbaq de miz daeh bongzbuetbuet, duz ngwz haenx nodning dwk, gou couh miz di yaek rueg okdaeuj, lau yaep he de youh heuh gou bang de gej gyaeujvaq okdaeuj, ndigah gou mbouj gamj gaen de byaij lo. Gou rag gyoengq doengzdoih daengx roengzdaeuj, dasoengq Aulungzveiz, gij naeng baihlaeng gou lij baez raq baez raq nyaeuq dwk.

(caengz sat)