Gou youq aen bause mbouj hung geijlai ndeu hwnjban, youq ndaw cungjbenhsiz guhhong ndaej cibgeij bi lo. Bause aeu caeuq bouxdoeg lienzhaeh, yienghneix aen dienhvah cungjbenhsiz couh youq gwnz bauq- ceij goenghai hawj vunz rox, bouxdoeg ciengzseiz dwk dienhvah daeuj gangj saeh. Gou ciep gvaq haujlai dienhvah, gyoengq bouxdoeg gangj saeh maz cungj yaek lumz liux lo, ngamq ndaejgeiq song aen dienhvah geiz- gvaiq caeuq gijwnq mbouj doxdoengz.

Cibgeij bi gonq, miz ngoenz ndeu, gou ndaej ciep aen dienhvah geizgvaiq ndeu. Boux dwk dienhvah haibak couh naeuz, de dwg boux coz gig okmingz, seizneix youq ndaw daihhag dang lauxsae. Gou dingq gangj aen coh le, couh rox de dwg boux vunz okmingz dahraix. Boux lauxsae coz neix guh gohyoz yenzgiu maqhuz okmingz, geij bi neix haujlai bause cungj baudauj gvaq de, gicej bause dou caemh dajsuenq bae caijfangj de.

Gou caengz ndaej han de, de youh gangj lo:“Gou aeu gauq vunz, gou dwg boux vunzcaiz bouxcoz mizmingz, seizneix deng bouxdaeuz gaemh’at, siengj heuh sou youq gwnz bauqceij daengh gij saeh okdaeuj!”

Laxlawz, gienh saeh de dwg yienghneix: De yaek sinhcingj buqlaeh dang fu gyausou, baihgwnz saemj gvaq caizliuh de le, nyinhnaeuz diuzgen de caengz hab geijlai, couh mbouj baecinj, de laih dwg baihgwnz hozgenz de miz dungxcaiz lai, daegdingq aeu gaemh’at de.

Gou naihsim dingq de gangj liux le, roxnyinh gienh saeh neix hung lai, dou guenj mbouj ndaej, couh aeu vah unq daeuj doiswz:“Saeh mwngz aeu bae gij bumwnz guenj cungj saeh neix haenx fanjyingj, roxnaeuz bae gij bause hung haenx naeuz.”

“Aenvih gij bause hung mbouj guenj, gou cij daeuj ra sou!” De sing sang fwt gou.

“Bause hung mbouj guenj, dou engq guenj mbouj gvaqdaeuj.” Gou lauxsaed lwnh de.

Siengj mbouj daengz, de hozgaek lo, hujdengdeng ndaq naeuz:“Sou cungj bause iqet neix yaek dai lo, gou daegdaengq dawz aen gihvei neix hawj sou okmingz, sou dauq lau dai mbouj gamj guh ha!” Ngamq gangj sat, de couh ok rengz gveng aen dienhvah, haih gou dingqnyi sing hung “ba” ndeu le deng doeksaet yat.

Doeklaeng gvaq haujlai bi le, gou dingq vunz naeuz, seizde boux lauxsae coz okmingz neix seizneix gaenq mbouj ndaej dingqgangj lo. Yienz- naeuz seizde de youh coz youh miz dungxcaiz, wngdang guh ndaej bae lai, hoeng de sim dingh mbouj roengzdaeuj, aeu vah raeuz daeuj gangj, couhdwg boux vunz neix mbouj rox guh vunz. Bouxvunz mbouj rox guh vunz, caeuq vunz gangj vah cungj maij dingjbak, baenzlawz caeuq vunz doxyouq, baenzlawz caeuq doengzsaeh guh saeh cungj mbouj rox, cungj vunz neix baenzlawz guh ndaej bae dem?

Mboengqneix, gou youh ndaej ciep aen dienhvah geizgvaiq ndeu. Ngoenzhaenx, miz bouxlaux ndeu dwk dienhvah daeuj naeuz:“Gou siengj gauq vunz, yaek gau boux vunz neix caeuq ‘daj ndaem cawz yak’ miz gvanhaeh.”

Gou dingq le ca di riu hwnjdaeuj. Vahgun naeuz “daj ndaem cawz yak”, gizsaed couhdwg gab vunzvaih vunz- rwix hwnjdaeuj. Seizneix guek raeuz dauqcawq cungj “daj ndaem cawz yak”, hoeng faenh hong gaeb vunzvaih vunzrwix cungj lwnz mbouj daengz bause dou bae guh ha.

Gou naeuz:“Mwngz dwk dienh- vah loek lo, gizneix mbouj dwg bangunghsiz guenj ‘daj ndaem cawz yak’.”

“Gou couhdwg ra sou, aenvih ndaw bause sou miz ‘boux ndaem yak’ guh saeh yak.”

Gou dingq le gwnz ndang hanh conh lo: Ndaw bause dou seizlawz miz “vunz ndaem saeh yak”, gou cungj mbouj rox saekdi.

Gou dinghdingh dingq de gangj liux le, cij rox dwg yienghneix: Goenglaux gingciengz raiz faenzcieng hawj dou, fuganh bauqceij dou yungh gvaq haujlai faenzcieng de. Hoeng duenh seizgan neix faenzcieng de yungh noix di, de nyinhnaeuz dwg bouxbien luenh yungh gienz, dan yungh faenzcieng vunzsug, mbouj yungh faenzcieng de. Mboengqneix, daengx guek dauqcawq “daj ndaem cawz yak”, goenglaux nyinhnaeuz bouxbien daegdingq gaemh’at de, yienghneix couh suenq dwg “boux ndaem guh yak” lu’ha?

Gou dingq daengz neix lumj gwn bya deng gangj gaz hoz nei hojsouh. Goenglaux dauq yied gangj yied vah lai, gou nyaenx mbouj ndaej dingjbak gangj naeuz:“Bouxlaux ha, mwngz naeuz duenh seizgan neix bouxbien mbouj yungh faenzcieng mwngz, gienh saeh neix dou aeu caz cingcuj. Hoeng mwngz nyinhdingh ndaw bause miz boux ‘ndaem yak’, danghnaeuz miz cingqgawq, mwngz goj bae mizgven bumwnz gijbauq. Danghnaeuz mbouj miz maz cingqgawq, vah neix mbouj ndaej luenh gangj!”

Gvaqlaeng cij rox, gizsaed goenglaux guh vunz guh saeh gvaqbouh lo: De baez lawz douzgauj, cungj siengj ndaej fazbiuj, mboujnex couh baenzngoenz dwk dienhvah ra bouxbien, haih daengz bouxbien nyap de lai le lienz hauhmaj soujgih cungj vuenh bae.

Doeklaeng, gou naemj ok aen banhfap daeuj gangj goenglaux lo.

Gou dwk dienhvah hawj de, unqswnh caeuq de gangj naeuz:“Mwngz maij raiz faenzcieng, lij gingciengz ndaej fazbiuj, mwngz ak lai, gou aeu hag mwngz. Bingzseiz gou caemh raiz di faenzcieng dinj, mbouj rox mwngz raen gvaq faenzcieng gou lwi?”

Yienznaeuz gou mbouj dwg boux canghraiz gig mizmingz, hoeng gou raiz faenzcieng dinj gvaq ndaej bae, gou lij ok gvaq song bonj saw dem. Goenglaux dingq gou gangj le han naeuz:“Gou gingciengz doeg faenz- cieng mwngz. Mwngz raiz ak gvaq gou lai lo.”

“Danghnaeuz dawz faenzcieng gou youq gwnz bauqceij dou fazbiuj, gij suijbingz faenzcieng gou gvaq ndaej bae ha! Caiqgangj lo, bause dou mbouj hanhdingh naeuz mbouj ndaej yungh faenzcieng boux bonjbauq, hoeng vih nyiengh hawj bouxdoeg ndaej fazbiuj lai di, bigvaq gou gungh raiz 10 bien faenzcieng, ngamq dawz bien ndeu youq bonjbauq fazbiuj, lw 9 bien gou luenh douzgauj hawj bause baihrog, ndaej fazbiuj 3 bien, faz- biujlig 30%. Caeuq mwngz beij gou yaez lo, mwngz douzgauj hawj dou 10 bien, ndaej fazbiuj 7 bien, fazbiujlig 70%.”

Raen de mbouj guhsing, gou youh naeuz:“Gou raiz 10 bien mauh gvaq buenqsoq deng vut bae, mwngz raiz 10 bien ngamq miz 3 bien mbouj yungh, mwngz ak lai lo!”

Daj baezneix hwnj, goenglaux ciuqyiengh raiz faenzcieng geiq hawj dou, hoeng de mbouj caiq luenh dwk dienhvah nyau bouxbien lo.