Sawqmwh, Aulungzgveiz suk dauq gij fwngz de, iet hwet, gou lau dwk doiqdauq yamq ndeu, baihlaeng “aiyo” sing he.

Mbouj rox dwg byawz deng gou caij mbat din ndeu, gou ndwn maenh le yawj fwngzgvaz Aulungzgveiz, lij ndei, mbouj deng duzngwz haeb, hix mbouj lae lwed, sim gou cij onj roengzdaeuj.

Seizneix, Aulungzgveiz engq yiemzsuk lo, de lumj lumz le dou geij boux lwgnyez neix, yaengx gen’gvaz, ngaemgyaeuj roengzdaeuj aeu fwngz- swix gej ok saivaq de, duet geu vaq ndaem raez gavaq lij binj haenx roengzdaeuj, cuengq youq gwnznamh, seizneix ndang de cij lw diuz vaqndaw saekmong.

De guh doenghneix gig mbouj cingqciengz, yied daeuj yied hawj gou roxnyinh doeksaet, nanzdauh de duet vaq yaek caeuq duz ngwz hung buekmingh?

Gou ngeix Ah Gunh gyoengqde itdingh hix cingq doeksaet, cijdwg byawz hix mbouj gamj oksing, cij ndaej nyaenx dwk, dinghdingh ndwn youq baihlaeng gou yawj.

Fwngz gvaz yaengx sang haenx cuengq roengzdaeuj lo, Aulungzgveiz caiq gungj hwet roengzbae, aen gyaeujhoq he gvih youq gwnz rinbanj, nyeng gyaeuj caeuq mbaq, youh iet fwngzgvaz haeuj ndaw geh bae lo.

Sim gou youh deng venj hwnj- daeuj lo.

Yawjraen mbaq de saenzdedded, goj liuh ndaej daengz de dwg aeu fwngzgvaz youq ndaw geh laj rinbanj damqra nyauxhoed dwk, couh lumj dou youq ndaw conghrin iq henz dah mo duzbaeu nei, caen hawj vunz yousim de ndaej hanh laeleklek.

Seiqhenz dinghrikrik, lienz gij sing Ah Giuh sup mug hix mbouj ndaejnyi lo, gou laihnaeuz gyoengqde cungj buetdeuz lo, riengjret cienq gyaeuj baez myaeg, 8 aen lwgda byaengq ndaej lumj bouxsien dawz dou ndaw miuh nei youh hung youh luenz, boux ndeu hix mbouj noix.

“Hei!”

Sawqmwh, gij sing lumj byajbag nei hawj gou doeksaet yat, ngamq simdingh roengzdaeuj, cij raen Au- lungzgveiz ndwn hwnjdaeuj, gen’gvaz roengzrengz dad coh baihlaeng, diuz faexgyaengh mong hau mbin coh baih dou. Dou baez foengx, yamq din cienq ndang couh buetdeuz.

“Duz neix caen dwg huq ndei!”

Aulungzgveiz youh hemq sing hung he, hat ndaej gij yamq gou menh roengzdaeuj, gou doq buet doq baenq dauqlaeng yawj, raen de lumj fatbag nei, ndwn youq cungqgyang dieg- hoengq, vangh diuz faexgyaengh he, gij yiengh neix beij haxbaenh Ah Gunh dang “Lij Bu” seiz vad faglem lij nyinhcaen haenqrengz.

“Gyoengqsou gaej buetdeuz ha! Daeuj bangfwngz ya!”

(caengz sat)