Song vunz caez muenghyawj gvaq dangqnaj mbanj aen ranz bakdou miz go’nganx hozngeng haenx, youh ngaemgyaeuj danqheiq. Geijcib bi seizgan baez yaepda couh gvaqbae, siengj seizhaenx baenz bang lwgsau lwgmbauq cingsaenz goekgoek, seiz- neix mizmbangj bae gonq lo, gyoengq lij lix cix boux dem boux byoem hau hwet goz, caeuq go’nganx hozngeng haenx doxdoengz. Dah lwgsau cij- daujyenz youq Namzningz guh dayoz lauxsae, mbouj you gwn mbouj you daenj, hojsik baenz ndang bingh faj dou mbouj ndaej ok; Saujging ndangdaej vanzlij ndaej, hoeng ndawranz miz vunzbingh lij aeu goq, daj haet daengz haemh cungj dwg- rengz; canhmouzcangj gag ndaek vunz dog, cungj mbouj nyienh bae ginglaujyen, sij mbouj ndaej aen ranzcoj lajmbanj; Huz swhling lwglan gig lai, gyoengqlwg cungj haeuj singz guhhong, geij boux lan vanzlij dwg de daeuj ganq……

Song boux de cingq gangjgoj, ndaw mbanj cienz daeuj le gij sing hemq Saujging. Songde ngiengxgyaeuj yawj bae, raen Saujging ndwn youq laj go’nganx hozngeng haenx vad fwngz. aiq ok saeh lo, songde couh vaiq buet gvaqbae. Haeuj dou yawj raen gyanghongh baet ndaej seuqsatsat, gij buhvaq ngamq saeg haenx cix venj youq gwnz faexsaux lo, caenh lumj geijcib vengq geiz nyig rumz mbinyagyag. Song boux de gaen Saujging haeuj fungh rug bae, cijdaujyenz byomvapvap buenq ing buenq naengh youq gwnz eijfaexcuk, da sawsoengsoeng yawj Huz swhling caeuq canhmouzcangj. Saujging yinx haeuj nab cienz gwnz daiz henz ndang cijdaujyenz bae, naeuz cijdaujyenz yaek hawj song fanh maenz ngaenz neix hawj de, de doi mbouj aeu.

Saujging naeuz de guh moix gienh saeh cungj geiq ndaej cingcing cujcuj, hab aeu geijlai cienzhong couh aeu geijlai. Hoeng, cijdaujyenz baenzbaenz cungj yaek hawj de. De couh heuh Huz swhling caeuq canhmouzcangj daeuj, geij boux vunz youq itheij gangj cingcuj, gij cienz neix de faen he hix mbouj doengh, deq dah lwgsau cijdaujyenz ma le ndei gyauhdai. Dah lwgsau cijdaujyenz baeznaengz ma cungj riuj daeh hung daeh iq doxgaiq dauq, hix yaek hawj de cienz.

Huz swhling yawj laeng canh- mouzcangj bae, mbouj rox yaek baenzlawz guh. Canhmouzcangj baez naemjnaemj le, sing daemq cam cijdaujyenz:“Beixnuengx, gij cienz neix mwngz nyienh hawj Saujging dwg lwi?”

Cijdaujyenz baenz buenq ngoenz cehda cij yaepgveb. De yawjyawj Saujging, cij doiq canhmouzcangj ngaekngaek gyaeuj.

Canhmouzcangj dawz nab cienz de hwnjdaeuj, oet haeuj ndaw fwngz Saujging bae:“Neix dwg cijdaujyenz hawj mwngz, mwngz couh aeu ba!”

Saujging dawz gij cienz dauq cuengq dauqbae:“Mbouj ndaej yienghneix guh……”

Canhmouzcangj youh caiq dawz gij cienz oet haeuj ndaw fwngz Saujging bae:“Neix dangq cijdaujyenz sien cei cienzhong hawj mwngz gonq, gou caeuq Huz swhling hawj mwngz guh cingq……”

Mbatneix cijdaujyenz lumjnaeuz dingq ndaej gig cingcuj, vaiqvaiq doiq Saujging ngaekgyaeuj. Cijdaujyenz ngeixngeix le, yawj laeng canh- mouzcangj caeuq Huz swhling bae, bak doenghvebveb, mbouj rox yaek gangj maz. Canhmouzcangj naeuz:“Cijdaujyenz, gaej simgip, mwngz menhmenh gangj. Dou deq mwngz!”

Gij sing conghbak cijdaujyenz lumj fatwij ne，gangj mbouj ok vah lo. Canhmouzcangj caeuq Huz swhling moengzwetwet yawj Saujging bae. Saujging naeuz:“Cijdaujyenz siengj gaen dou bae haw……”

“Baenzlawz seizneix cij gangj ne?” Huz swhling naeuz.

“Neix dou lij deq maz dem?” Canhmouzcangj naeuz.

Huz swhling aemq dawz cij- daujyenz couh byaij ok bakdou, canhmouzcangj caeuq Saujging couh ram aen eijfaexcuk gaen laeng okdaeuj.

Mwhneix, miz geij boux vunzlaux caeuq lwgnyez ndwn youq henz aen maxci, siengj deq naengh aen maxci bae haw. Daj gyoengq hauxseng cungj haeuj singz bae guhhong le, ndaw mbanj caenh miz bouxlaux lwgnyez youq ranz ndwi lo, banci gig noix hai gvaqdaeuj, bouxlaux daiq lwgnyez nanz byaij ndaej gyae, baenzneix gyoengqde maij deq aen maxci Huz swhling bae haw.

Canhmouzcangj caeuq Saujging dawz aen eijfaexcuk cuengq hwnj gwnz maxci. Huz swhling dawz cijdaujyenz umj naengh gwnz eij bae, Saujging naengh youq henz de rez. Raen gwnz ci naengh rim le, Huz swhling mbouj naengh lo, yien max byaij dwk.

Canhmouzcangj youh boq aen dig de lo. Mbatneix de boq gij go cungj dwg bonjfaenh gag bien, gig miz gij feihdauh fwen bonjdeih. Gij sing dig de caenh lumj gij rumz ci mbawfaex, riengz gij sing daez max, youq gij roen vutvut ngutngut gwnz bya goksad rwenzraeuh……(sat)