Aiq dwg mohrin ndaej nanz lo, gaiq rinbanj doxlienz miz le gij geh, mizmbangj geh saeq, mizmbangj geh hung, haujlai nywj couh doek rag youq ndaw geh bae lo. Liuh mbouj daengz baihlaj daizcaeq lij miz diuz geh yienghneix gvangq, hawj duz ngwz hung neix bae guh rongz. Ndaejgeiq gou lij youq gwnz rinbanj daizcaeq ninzringz gvaq, hix caeuq Ah Gunh gyoengqde youq henz dwk geizrin gvaq, gij buenzgeiz seiqfueng vanzlij veh youq gwnzde, byawz rox diuz geh lajde gingqyienz dwg aen rongz duzngwz!

Hei! Yungyiemj lai lo.

Aulungzgveiz sawqmwh cengj hwet soh, hawj gou doeksaet caez, ca di couh yaek cienq ndang buetdeuz lo. Cij raen de daj ndaw daeh mbon ok aen bingz iq he daeuj, hai lwgsaek aen bingz, dauj di mba youq gyang fwngzswix, doeklaeng saek ndei lwg- saek, siujsim riri oet haeuj ndaw daeh, dawz mba ndaw fwngzswix cat youq fwngzgvaz caeuq gengoenh, roengz- rengz bae nu, youh binj genbuh guh song hop, menhmenh gungj hwet roengzbae, caiq bae cazyawj gij geh rinbanj.

Caeklaiq haxbaenh gou caengz buetdeuz, mboujnex, gij naj gou mbouj deng saet caez? Doeklaeng youq dangqnaj Ah Veij、Ah Gunh gyoengqde aen gyaeuj gou baenzlawz ngiengx ndaej hwnj?

Ndawsim gou yienznaeuz yiengh- neix siengj, hoeng yawjraen Aulungz- gveiz baenzneix yiemzsuk, haeujsim, menhnumq, saeknaj haenbingj, gou roxnyinh seiqhenz engq caemrwg dwglau lo, caen dwg hawj vunz mbei lek ndang saenz. Yienznaeuz caeux couh rox de rox gaeb duzngwz, hoeng caengz ndaej caenda yawj de gaeb gvaq, hix mbouj ndaej yawj de gaeb gvaq duz ngwz baenzneix hung lumj ngoenzneix bungz, danghnaeuz de gaeb mbouj ndaej, dauqfanj gik duz ngwz hung haenx, yienghneix couh……

Aulungzgveiz ning baez ndeu galaeng, hwet gungj ndaej engq daemq lo, gij ngeix gou deng dajduenh lo, youh ndaejnyi gij sing Ah Giuh sup mug, caemhcaiq beij haxbaenh lij yiengj. Nyengqda baez yawj, yenzlaiz Ah Veij、Ah Gunh、Ah Giuh caeuq Ah Cang gyoengqde 4 boux gaenq ndoj youq baihlaeng gou caez, dawz gou dangj youq baihnaj ne!

Hei! Sim gou doq diuq mbat he, Aulungzgveiz iet fwngzgvaz haeuj ndaw geh rinbanj bae lo, neix……caen dwg…… Gou aj bak hung raeuh, da luenzlumlum daengx mbaq ngeng de, ca di mbouj gamj diemheiq.

Aulungzgveiz baenzneix mbei- hung, de yaek ietfwngz haeuj ndaw bae hawj duz ngwz hung haeb? Gou saedcaih mbouj rox de yaek guh maz, buengzda gou cungj mbouj gamj yaep baez ndeu, gaenjcieng ndaej dungx youh nanq youh raeng, yaek nyouh conh lo.

(caengz sat)