Fwn ngamq dingz, gwnz roen lij raeuzradrad. Duzmax geq baegfofo bin daengz byongh lingq couh bin mbouj hwnjbae lo. Raen aen maxci doenq dauqlaeng, Huz swhling vaiq saet roengzbae gaex ci. Saujging caemh siengj roengzbae, Huz swhling hawj de naengh youq. Canhmouzcangj ngamq yaek roengz ci raen Saujging baez naengh roengzma le, ndaek hangx de hix lumj nem rin nei doengh cungj mbouj doengh lo.

“Gou heuh mwngz naengh la?” Huz swhling dacaengz canhmouzcangj.

“Boenq boux hek gaex ci?”

“Doengh goeng’ak daeuj cazyawj lij ndaej buenq roen roengz ci coengh vunz gaex ci ne?”

“Duzmax neix byombyangbyang mbouj miz rengz lo, lij sij mbouj ndaej vuenh. Laihnaeuz dwg vuengz- daeq gwih gvaq ha?” Canhmouzcangj roengzbae gaex ci, conghbak lij mboenbyoedbyoed.

“Gwnz roen mwngz raen duzmax lawz ndei, mwngz ak lai couh bae rag duz de ma ha!”

“Baenzneix ledged, mwngz yienghneix guh danghnaeuz guh bouxhaici hix dwg hawj vunz naengh ci rwix!”

Canhmouzcangj bak rwix sim soh, gaex ci hix mbouj ndojgik mbaet rengz ne. Song boux caezsim gaprengz gaex ci. Huz swhling doiq duzmax geq hat song sing, duzmax geq hix swenjeu song sing, haenqrengz bin hwnj lingq bae.

Gwnz lingq miz aen mbanj iq ndeu. Mwhneix ndaw mbanj caem- rwgrwg, mizmbangj ranzvunz laeng ranz naj ranz nya sang gvaq ciengz. Saujging roengz ci le, yawj laeng Huz swhling caeuq canhmouzcangj naeuz:“Sou miz saeh couh bae gonq.”

“Mbouj youqgaenj, mwngz nyaengq bae!” Huz swhling naeuz.

“Mbatmbat cungj hawj sou deq……”

“Dou gangjgoj deq mwngz.” Canhmouzcangj naeuz.

Saujging riengjret coh diuz roen henz mbanj byaij bae. Canhmouzcangj yawj Saujging haeuj laeng ranz bakdou miz go’nganx ngeng ndeu bae, haenh naeuz:“Saujging caenh lumj mbouj rox laux nei, seizneix vanzlij lumj geijcib bi gaxgonq dou yienj heiqyienghbanj seizde……”

“Geij bi neix de gwnhoj lai lo! Liuhleix vunzbingh ciengx gya, youh yaek goq mehlaux caeuq daeg- nuengx……”

“Cijdaujyenz miz fukheiq!”

“Vunz gaenq dawz mbouj ok dou lo……”

“Dawz mbouj ok dou ciuqyiengh ndaej guh’angq!”

“Yakdingq!”

“Neix miz maz yakdingq? Deq gou miz cienz le, hix cingj vunz daengz ranz daeuj guh’angq……”

“Deq mwngz miz cienz, lajmbwn hix mbouj miz vunz gungz lo!”

“Byawz rox? Seizheiq daengz fajdou caiq hung haep ndaej caiq maenh cungj dangj mbouj ndaej!”

Huz swhling daj ndaw daehdox canhmouzcangj mbon ok aen dig ndeu:“Gai di mbaenq faexcuk neix, mwngz hix siengj ndaej fatcaiz ha?”

Canhmouzcangj vaiqdi daj gwnzfwngz Huz swhling dued aen dig gvaqma:“Neix dwg yisuzbinj, mwngz rox maz?”

“Gou couh mbouj naeuz de mbouj dwg yisuzbinj gonq bw, seizneix lij miz geijlai vunz daeuj cawx doengh mbaenq faexcuk neix dem?”

“Maz faexcuk, dwg yisuzbinj!” Canhmouzcangj mbouj leixlangh Huz swhling lo, ngiengxgyaeuj muenghyawj go’nganx goz ngeng baihnaj aen ranz haeuj mbanj bae, mbouj rox ngeix daengz maz le, doq boq dig hwnjdaeuj lo.

Huz swhling gaen gij sing dig canhmouzcangj ngon hwnjdaeuj. Neix dwg souj go heuhguh 《Sihsah, aen mbanjranz ndeigyaez gou》, dwg diuz gocaz ndaw denyingj《Nanzhaij Funghyinz》. Doenghbaez youq gwnz daizheiq, Huz swhling daz ngeihyienz, canhmouzcangj boq dig, Saujging caeuq cijdaujyenz ciengq songbouh- ciengq. Gyoengqde yienj heiqyiengh- banj《Sahgyahbangh》okmingz, doek- laeng vunz ndaw mbanj cungj mbouj heuh gij coh caen gyoengqde, doengh coh bouxvunz ndaw heiq couh bienqbaenz gij coh gyoengqde lo.

Canhmouzcangj boq diuz go neix sat le, laebdaeb ngiengxgyaeuj muenghyawj go’nganx goz ngeng baihnaj aen ranz haeuj mbanj, cam Huz swhling:“Danghnaeuz seizneix gou miz 10 fanh maenz ngaenz, mwngz nanqnanq gou siengj guh maz?”

“Haeuj singz hai aen bouq he gai dig.”

“Miz 10 fanh maenz ngaenz lij aeu gai dig?”

“Yienghneix mwngz siengj guh maz?”

“Dawz doenghbaez bang vunz raeuz dauq comz hwnjdaeuj yienj heiq. Mboujdan youq lajmbanj yienj, vanzlij haeuj ndaw singz bae yienj dem……”

“Hojsik, mizmbangj mbouj ndaej daeuj lo! Mwngz yawj cijdauj- yenz……”

(caengz sat)