“Vu vu vu! Vu vu vu!” Byawz youq gizhaenx daej ne? Duzroeg raen geizgvaiq lai couh yawj hwnj yawj roengz, sijsaeq dingq sing daej neix. Doeklaeng rox dwg rijiq dahnuengx dinbya, rijiq vihmaz daej baenzneix siengsim ne?

Roegiq guhmuengz mbin daengz henz ndang dahnuengx rijiq, gvensim dwk cam naeuz：“Rijiq dahnuengx, mwngz baenzlawz ne? Byawz hangz mwngz ha?” Rijiq dahnuengx doq uet raemxda doq lwnh：“Roegiq dahcej, mwngz yawj, bangxhenz gou aen nungzgyahloz baez hai le, vunz daeuj henz gou guhcaemz lai dangqmaz bae, miz haujlai vunz vut nyapnyaj haeuj gwnz ndang gou daeuj, gou bonjlaiz ndang seuq sawcingh dangqmaz, vunz vut nyapnyaj le gou couh bienq rab lai, diuzvunj gou bienq ndaem caez, daengx ndang lij miz heiq haeu dem! Vu vu vu!” Rijiq dahnuengx gangj le gangj le couh simnaiq lai daej hwnjdaeuj.

Roegiq dingq le, caemh raen simnaiq lai, couh ra geij boux baengzyoux ndei daeuj：Duzciengh daeggo、maxdah daxlungz、duzmbaj dahnuengx, lij miz daegnuengx duzbeih daengj, caez daeuj doxyaeng baenzlawz bang rijiq dahnuengx. Gyoengqde dingq roegiq lwnh le, hozndat lailai, couh guhdoih bae daengz henz rij yawj, dwg caen dahraix. Yienghneix maxdah daxlungz doiq daihgya naeuz：“Boux ndeu deng cai, vunzlai caez bang. Raeuz doxcaez ok rengz, bang rijiq dahnuengx baet seuq gij nyapnyaj neix bae!” Naeuz guh couh guh, duzciengh daeggo aeu aenndaeng youh hung youh raez de baez di baez di sup gij nyapnyaj fouz youq gwnz raemx haenx hwnjdaeuj liuxcaez bae. Doengh boux baengzyoux wnq hix nyaengq guh, miz vunz gip, miz vunz comz, miz vunz cang, miz vunz daeh, baebae dauqdauq, nyaengq hwnj nyaengq roengz.

Ngoenz daihngeih, ndit ronghsagsag, roeg ciuz va hom. Gyoengq baengzyoux roegiq baet seuq nyapnyaj lo. Seizneix rijiq youh bienq dauq ndei lumj gaxgonq nei, seuqcingh sawrwk, saw baenz yawj ndaej raen rinreq lajdaej, seuq baenz ndaej ingj raen gofaex henz rij bae.

Daihgya raen rijiq dahnuengx baenzneix gyaeundei le cungj angq raixcaix, gyoengqde lauheiq vunz lij dawz nyapnyaj vit roengz gwnz ndang rijiq dahnuengx bae, couh daegdaengq daengj gaiq baizfaex daezsingj ndeu, gwnz baiz sij naeuz：Dieg neix dwg ranz raeuz, vunzraeuz caez in’gyaez. Rijiq dahnuengx gamjdoengh dangqmaz, vihliux gyo’mbaiq roegiq caeuq gyoengq baengzyoux de, de cingj roegiq caeuq gyoengq baengzyoux de daeuj ndaw ranz hai ciengz yinhyoz vanjvei ndeu. Daj neix baelaeng, gyoengqde doxndiep doxgyaez baenz ranz ndeu, angqvauvau guhdoih youq.

（Vei Sihyinz/魏诗耘）