“Vaiqguh vaiqguh, rauq naz ndaem haeux.” Dang roegvaiqguh- vaiqguz hemqgugu, nungzminz couh hainduj ndaem naz lo. Daxboh yousim daxgoeng daxbuz youq lajmbanj nyaengq mbouj gvaqdaeuj, couh heuh gou ngoenzsinghgiz ma lajmbanj bang doxgoeng daxbuz ndaemnaz, couh yienghneix, gou hainduj baez daej- niemh ndaemnaz he lo.

Gou daeujdaengz lajmbanj, dax- goeng gaenq dawz gaiqnaz hung bakmbanj caerauq ndei lo, yienghneix couh ndaej hainduj ndaemnaz lo. Gou angqfaengfaeng riengz daxgoeng daxbuz bae ndaemnaz, gou ngamq roengz naz, song ga couh deng mboet youq ndaw boengz, gou miz di ndwn mbouj maenh, youh roxnyinh miz duzmaz cingq haeb gahengh gou, youh humz youh in. Yienghneix gou couh daj ndaw naz benz hwnj haenznaz bae. Gou soengz youq haenznaz yawj daxbuz caeuq daxgoeng ndaemnaz, cij raen gyoengqde fwngzswix dawz gaem gyaj, fwngzgvaz mbek go’gyaj ok ndaem roengz naz bae, ndaem ndaej riengjret vaiqvit, yaep ndeu couh ndaem ndaej benq naz ndeu, vanzlij ndaem ndaej baenz hangz baenz coij, cingjcingj caezcaez, yawjdwk caen hawj vunz haenhcaekcaek. Yienghneix gou youh caiq roengz naz bae, cam daxbuz aeu gaem gyaj ndeu, lumj gyoengqde ityiengh mbek go’gyaj okdaeuj ndaem roengz naz bae, hoeng gou yawj geij hangz gyaj gou ndaem haenx, ngutngut ngeujngeuj, yakyawj raixcaix! Daxbuz naeuz: “Mwngz caenhguenj ndaem roengzbae, ngut- ngeuj mbouj youqgaenj, go’gyaj youq ndaw boengz rox swhgeij maj hwnj- daeuj. ” Gou ngaekngaek gyaeuj.

Gou lumj daxbuz nei ngaem gyaeuj gungj hwet, youq ndaw naz ndaem geij go gyaj, couh daen laeng yamq ndeu, mbouj yaep ndeu, gou cungj hwet naet ga in, gyaeujngunh dava liux. Yawj daxgoeng daxbuz ndaemnaz lumjbaenz gig soengswt, mbouj siengj daengz dwg yienghneix dwgrengz. Laxlawz ndaemnaz gij hong neix dwg mbouj ndei guh ha. Hoeng gou mbouj gamj doiqdauq, daxgoeng daxbuz yienghneix geq lo, lij mbouj yietnaiq saek yaep laebdaeb ndaem, gou baenzneix coz baenzlawz couh mbouj guh ne. Gou cij ndei ndaem yaep ndeu couh yietnaiq yaep ndeu. Gig mbouj yungzheih ndaem daengz naz cungqgyang, hoeng gizhaenx boengz gig laeg, song ga gou mboet youq ndaw boengz baenzlawz yot cungj yot mbouj hwnj. Ai, seizneix gou cij roxdaengz gijmaz heuh yamqdin nanz byaij lo. Gou yungh rengz baez yot ga, “buba” sing ndeu, gou deng laemx youq ndaw boengz, baenz“duzmou ringx boengz”lo. Daxgoeng daxbuz yawj gij yienghceij gou, cungj riuhoho lo.

Mbouj siengjdaengz, ndaemnaz dwg baenzneix hoj guh ha!

（bouxlauxsae son’gyauq/指导老师：Vangz Gveiyangh/黄桂香）