4 nyied 16 hauh daengz 17 hauh、20 hauh daengz 22 hauh, Aen Siz Sawcuengh Cunghgoz Minzcuz Yij- vwnz Fanhyiz Giz youq Nanzningz hai hoihhong, cujyau lwnhyaeng《Cibgouj Daih Doxdaeuj Gij Vwnzyen Senjbien Youqgaenj Haenx》(cek gonq) ndawde 380 lai aen sawloih, vih saedhengz fanhoiz hanghmoeg guh ndei hong caepcawq.

Baez hoih neix youz doengh boux canghfanhoiz miz fugauh cizcwngh doxhwnj camgya. Aen hoih neix ciuqsouj yenzcwz“vat、cauh、ciq”, haeujgvangq bae vat、haeujlaeg bae vat、lingzvued yungh ndei sawloih minzcuz, siujsim hableix cauh sawloih、ciqyungh sawloih, habdangq camciuq gij banhfap cawqleix aen banjbonj fanhoiz cwngci vwnzyen baenz Yinghyij haenx, caenhrengz guhdaengz yungh gij vahcoj haemq cinghseuq haenx bae byaujdaz, roengzrengz gaijbienq gij guhfap cug aen sawloih doiqciuq hoiz、ciuq sawmienh hoiz haenx, caencingq guh daengz gawq lauxsaed doiq nyuenz- faenz youh lauxsaed doiq bouxdoeg, engq ndei saedyienh aen muzdiz haidaeuz Gun hoiz Cuengh.

Baez hoih neix, doengh boux canghhoiz coz youq Baekging haenx yungh veihsin camgya hai hoih、dingq hoih.

（Cau Fungh）