Ngoenzlwenz gwn maknganx, gou mbouj re couh ndwnj naed ngveih ndeu roengz ndaw dungx bae. Gyanghaemh, gou yawjraen——

Gwnz gyaeuj gou maj ok go faex- maknganx iq ndeu, gwnz gomaknganx dawz rim lwgmak.

Gou youq baihnaj ranz guhcaemz, mbouj rox seizlawz, miz lailai lwgnyez daeuj le, doxhumx yawj gou. Gou byaij bae doiqnaj vunzlai, gyomq roengzdaeuj naeuz: “Gwn maknganx lwi? Yaek gwn couh mbaet vei!”

Vunzlai gwn dwk maknganx cungj naeuz: “Van lai.”

Gwn maknganx le, vunzlai cam gou naeuz: “Mwngz guhlawz ndaej youq gwnz gyaeuj maj go faexmaknganx ndeu okdaeuj ne? Lwnh dou dingq ndaej lwi? Dou goj yaek youq gwnz gyaeuj maj ok go faexmaknganx ndeu bw.”

Ndaej vei, guhlawz mbouj ndaej ne, gou naeuz: “Gwn maknganx mbouj re ndwnj le naed ngveih ndeu roengz dungx bae, faexmaknganx couh maj ok gwnz gyaeuj gou logo.”

“Gou goj mbouj re ndwnj naed ngveih maknganx ndeu gvaq, guhlawz gwnz gyaeuj gou mbouj maj faexmaknganx ne?”

“Wgo, gou goj ndwnj gvaq go. Mwngz yaeuh vunz!”

“Daegyaeuh!”

“Daegyaeuh!”

Gyoengqde mbouj saenq gou, cungj naeuz gou dwg bouxguhyaeuh, mbouj caeuq gou guhcaemz lo, gou gip yaek daej bae, couh ndiundeq daeuj lo——Gou guh lawz dwg yaeuh vunz ne? Dahraix go, couhdwg aenvih gou gwn maknganx mbouj re ndwnj naed ngveih ndeu roengz dungx, cingq loqfangzhwnz go.

（Daj《Bonjsei Sim Lwgnyez》（Veiz Gizlinz raiz）senj okdaeuj, Lwgfwngzmeh/卢奋长 hoiz）