Ah Gunh gyoengqde beij gou yawj ndaej singj, raen duzngwz baenq gyaeuj, caeux couh diuq roengzdaeuj, daj baihlaeng moh buet bae, yaep he couh buet ndaej gig gyae lo.

Duzngwz neix nod daengz baihnaj mohgungj, dingz roengzdaeuj, lumjnaeuz rox 4 boux lwgnyez baihgwnz gaenq buetdeuz lo, lij dwg cienq doxdauq haeb boux lwgnyez gwih youq gwnz saeceijrin ba!

“Ah Byauh! Ah Byauh mwngz lij mbouj vaiqdi buet?”

Ah Veij、Ah Gunh、Ah Giuh caeuq Ah Cang youq gizgyae heuh gou, gou faen mbouj ok dwg gij sing byawz, swngz duzngwz hung youq daizcaeq baihnaj moh naemnaiq seiz, mbouj aeu gyoengqde daezsingj, gou hix rox yaek aeu bin roengz saeceijrin buetdeuz bae, hoeng lumjnaeuz deng duzfangz dawz nei, saeceijrin gaebga gou cingq buet, roxnyinh youq ndaw fwjmok buetfwfw, cungj cingzgingj neix youq ndaw fangzhwnz raen ceiq lai lo. Gou ciengzseiz loqraen miz duz iugvaiq naj heu heuj raez caemhcaiq byoem nyungqnyangq he gwq gyaep gou. Gou gig lau, yaek hemq, youh hemq mbouj ok; yaek deuz, song ga lumj miz geij bak gaen naek, youh lumj faiq nei, unqnemnem, youh naekranran, ning mbouj ndaej hix yamq mbouj bae, hoeng iugvaiq gaenq youq baihlaeng gou iet fajfwngz miz gij rib sam seiq conq raez coh laeng gyaeuj gou, gou nyinhnaeuz dai lo, dai lo, baezneix itdingh dai lo……

“Aiya……” Gou swenj sing he, gij gingj dangqnaj fwt baez bienq, bienq ndaej laepyaenz caemrwg, yienzlaiz ninz youq gwnz congz, daengx ndang hanh conh, sim diuqbubbub, baih byaidin cienz daeuj gij vah ienq daiq ngamq ndiu:

“Hemq maz, Ah Byauh ninz gvai gwq.”

Gou ningning song ga, lij gungjgoz dwk, miz di mazmwnh, couh caeuq seizneix doxdoengz, unqnemnem, mbaeumbengmbeng, saekdi rengz hix mbouj miz, gou baenzlawz mbouj rox aeu youq seizneix buetdeuz ne? Hoeng song ga gou mbouj dingqgangj, unqnemnem yo mbouj ndaej hwnj, cijndei bamq youq gwnz saeceijrin, gag ngeix: Neix dwg youq ndaw loq ba! Moix baez fangzhwnz daengz yaek saetmingh seiz, mbouj dwg baez fanndang ndiu le bonjfaenh lij bingzan ninz youq gwnz congz lwi? Ceiq lai deng bouxlaux ndaq saek coenz song coenz, aenvih de ninzcaem deng sing swenj gou hwk ndiu lo. Hoeng seizneix, aen loq neix baenzlawz lij caengz ndaej ndiu ne? Baihnaj baenzlawz lij bienq ndaej laepngaungau bae ne? Gij sing daiq ndaq ne?

(caengz sat)