Riengz binghdoeg doxraengh,

Daengz mwh ceiq youqgaenj;

Seizneix daengx guek caenh,

Gaenj dingj bingh soi haenq.

Haujlai gohyozgyah,

Caenndang ca fuengzceih;

Binghdoeg de ceihleix,

Ak ngeix ndaej daengz cienz.

Canghyw haujlai boux,

Haenqrengz youq itsienq;

Bauj sengmingh ancienz,

De gungyen ceiq daih.

Doiq binghdoeg lah daeuj,

De cungj aeu fad roengz;

Suenq de ceiq miz goeng,

Hoeng coengzlaiz mbouj angj.

Haemh de mbouj ndaej ninz,

Donq gwn mbouj an’onj;

Vih bouxbingh ndei gonq,

Ok bonjndang goengliengh.

Ndek bohmeh gag youq,

Hwnj couh buekmingh guh;

Dwgrengz hix mbouj nguh,

Geu buhhau mbouj duet.

Binghdoeg yienghmoq neix,

Gaenzgaeq youq hoengheiq;

Raeuz louzsim youh geiq,

Heiq maz hix mbouj lau.

Deng bingh rangh dauq doz,

Raeuz doxcaemh dingjhoenx;

Caezgya hwnjcoencoen,

Binghdoeg soenx deuz liux.

Gaxgonq sevei gaeuq,

Ngeix daeuj cungj ndeilau;

Miz bingh swhgeij bau,

Vunz daeuj lau haeuj gyawj.

Cijmiz sevei moq,

Diuz neix mbouj lau fanz;

Daengx biengz dangj mbouj nanz,

Mbouj fanz wj(mbouj) boux coengh.

Gungcanjdangj lingjdauj,

Gauj minzcuz doxgiet;

Sevei moq mbouj yiet,

Vunz daegbied haeujcoengh.

Seizneix miz bingh rangh,

Cunghyangh cungj yawjnaek;

Lwgminz ninz ndaej ndaek,

Enjaek daeuj fuengzre.

Gij bingh rangh mbatneix,

Hix leixhaih ndeilau;

Gaenx yawhfuengz mbouj lau,

Bauj ndaej dangj banhlah.

Doiq sinhgvanh feiyenz,

Aeu cienzmienh fuengzgaemh;

Daihgya sim caezcaemh,

Naemj cawz binghdoeg bae.

Geiq ndawsim lo raeuz,

Okdou daep goujcau;

Vunz gaej luenh bae gyaux,

Fajfwngz bauj swiq seuq.

Ciuq iugouz roengz fap,

Cij mbouj lab banhlah;

Coh binghdoeg hoenx gaj,

Binghraq dingh deng mied.