Sujgyaj, gou caeuq daxboh daxmeh lij miz daegnuengx daeuj daengz Fangz- cwngzgangj, seizhaenx mbwn ciemhciemh laep lo, yienghneix dou couh youq gizneix gvaq haemh ndeu.

Ngoenz daihngeih dou daeuj daengz Ginhdanh, rieg ndangdaenj youzraemx ndei le, dou couh byaij bae coh henz haij. Gwnz sadan miz haujlai saehaij, miz di lij ndoj youq ndaw sa, couh lumj lij caengz ninz ndiu. Miz di conh ok buenq aen ndang lumj cingq iet gyaeuj daeuj yawj seiqgyaiq baihrog nei. Miz di daengx ndang ninz youq gwnz sa, lumj naeuz aen seiqgyaiq neix yienghneix hung, gou hix okdaeuj byaij baez ndeu. Dou daeuj daengz henz haij couh yawjraen gij raemxlangh fubfed dongj daeuj coh dou, mboujduenh dawz dou dongj hwnj gwnz hamq, caj raemxlangh baez doiq, dou couh cung roengz ndaw haij bae. Raemxlangh yied daeuj yied hung, daj yienzlaiz langh iq menhmenh bienqbaenz langh hung, langh hung bongj hwnj lij sang gvaq vunz bae. Ciep roengzdaeuj raemxlangh yied daeuj yied hung, yaek dawz dou gienj roengz haij bae, hoeng gou caeuq daegnuengx cungj mbouj lau saekdi, lij dwg guhcaemz ndaej gig angq. Daxboh daxmeh heuh dou hwnj hamq lo, dou gaenbonj dingq mbouj nyi, laebdaeb guhcaemz.

Seiz banhaemh, gwnz danhaij gingj- saek engq gyaeundei, lumj fuk dozveh ndeiyawj ndeu, daj gyae muengh bae, raemx caeuq mbwn doxlienz, mbwn caeuq raemx doxrangh, raemxhaij deng nyumx baenz saek henjgim, raemx mbwn caemh saek, youq baihsae henz gapgyaiq raemx mbwn doxciep, daengngoenz lij fatok gij ronghgim henjmyanmyan, fwj gwnz mbwn hix deng nyumx baenz saekhoengz gig ndeiyawj.

Baezneix gou daeuj daengz Fangz- cwngzgangj caen mizyinx, mboujdan guhcaemz ndaej gig angq, lij yawjraen gingjsaek gyaeundei. Fangzcwngzgangj, gou gyaez mwngz!

（bouxlauxsae son’gyauq：Vangz Gveiyangh/黄桂香）