Gou gyaez bae cauhsi youz. Ngoenzneix gou lumj bingzciengz ityiengh bae cauhsi youz, sawqmwh daj baihlaeng cienz daeuj sing ndeu：“Nyaeb ciengj!” Simdaeuz gou yaepyaep saenz, dwg seizlawz dingq gvaq coenz vah neix? Gou caem youq ndaw dauqngeix laeglaeg bae.

Seizhaenx dou doeg haj nienzgaep, miz ngoenz ndeu banhaet yaek cuengqhag seiz, yijvwnz lauxsae saenzmaed dwk doiq dou gangj: “Ngoenzneix banringz ban raeuz yaek guh nyaeb ciengj hozdung, doxgaiq dajciengj miz haujlai cungj bw!” “Ye!” Gyoengq doengzhag baez dingq couh doxcaez hemq hwnjdaeuj, ciepdwk bak lai bak daih gangj hwnjdaeuj, dauqdaej miz gijmaz doxgaiq nyaeb ne? Diuzman roxnaeuz bonjsaw……

Banringz hwnjdangz lo, hoeng, lij mbouj caengz raen yijvwnz lauxsae, dou daengx ban hagseng lwgda cungj cimyawj rog dou. Dang baihrog cienz daeuj gij sing byaij loh dou ceiq sug seiz, cungj gag caem roengzdaeuj, lwgda lumj miz byawz yinx nei, cungj caez yawj gwnz fwngz lauxsae gaem aen loengx seiq mienh cungj nem miz cih “ciengj” youh hung youh hoengz haenx. Lauxsae byaij hwnj gwn gyangjdaiz, couh sien yungh lwgda yawj dou mbat ndeu, yienzhaeuh youh riu dwk cam dou: “Sou gyaez nyaeb ciengj lwi?”

“Gyaez!” Dou daihsing han naeuz.

“Ndei, raeuz couh hainduj nyaeb ciengj ba, sou byawz dawz fwngz yaengx ndaej sang, gou couh heuh byawz hwnjdaeuj nyaeb.” Gangj sat de lij daeg- daengq ngauz aen loengx haenx geij mbat.

Lauxsae mbouj caengz gangj sat, gij fwngz dou couh lumj gorangz nei doxcanj yaengx hwnjdaeuj. Boux naengh youq baihnaj ndei lai lo, lauxsae baez yawj haengjdingh yawjraen gyoengqde gonq, ndigah miz mbangj doengzhag naengh youq cungqgyang raen le, lau lauxsae yawj mbouj raen swhgeij, ndawsim ngeix: Dou mbouj ndaej naengh baihnaj seizneix vi lai lo, dou ndwn hwnjdaeuj, nanzdauh yaengx fwngz mbouj beij boux naengh baihnaj haenx sang? Lauxsae mbouj heuh dou lij heuh byawz dem！Gyoengq doengzhag naengh cungqgyang haenx couh ndwn hwnjdaeuj. “A!” Doenghboux doengzhag naengh youq geij baiz baihlaeng raen le, cungj caez hemq hwnjdaeuj, sim gip le, lumj doxiu nei ndwn hwnj gwnz daengq daeuj yaengx fwngz……

Lauxsae raen dou baenzneix siengj nyaeb ciengj, cungj riu ndaej bak mbouj haep, naeuz:“Ban raeuz vunz haemq lai, lauxsae mbouj miz baenzlai ciengjbinj, ndigah, lauxsae heuh daengz byawz, byawz couh hwnj gwnz gyangjdaiz daeuj, mboujnex couh caj baez laeng lo.”Gyoengq dou baez dingq laexsae baenzneix gangj couh dawz fwngz yaengx ndaej engq sang lo. Yaep ndeu, lauxsae couh heuh mingzcoh, mboujgvaq gou roxnyinh gig geizheih, lauxsae vihmaz cungj dwg heuh boux gik doegsaw hwnjbae? Boux hagsib ndei cungj mbouj heuh saek boux? Vih gijmaz ne?

Doenghboux doengzhag ndaej hwnjbae miz mbangj daekeiq vauvau, naj ngiengx hwnj mbwn, conghndaeng lumj hai ndaej hojceh nei, miz mbangj guh najgveijgvaiq coh dou doenghboux naengh youq baihlaj haenx, yienghneix guh dou youq laj youh hozhaenz youh hoznyap.

Seizneix lauxsae youh hai bak gangj lo：“Hainduj nyaeb ciem lo, danhseih nyaeb dawz ciem mbouj ndaej sien hai daeuj yawj, gou heuh seizlawz hai cij ndaej hai.” Lauxsae yied baenzneix gangj dou yied raen geizheih, youq gwnz daiz miz song boux doengzhag laeglemx cienq ndang gvaq bae hai yawj. A? Naj song de baenzlawz bienq la? Dang lauxsae heuh gyoengqde hai ciem seiz, o, sojmiz vunz naj cungj lumj haxbaenh song boux doengzhag ityiengh——najsaep liux, cungj lumj aen heiqgiuz deng vunz langh heiq nei, ndwn youq gizhaenx doeknaiq liux. Dou youq laj bouxboux hix raen geizheih: Dauqdaej gyoengqde nyaeb ndaej maz ciengj ne?

Ciepdwk lauxsae heuh gyoengqde dawz ciem hai hawj dou yawj, haha……Dou ca di riu ndaej vax yaek biengj bae, yienzlaiz gij ciem neix mbouj dwg sij diuzman roxnaeuz bonjsaw! Cungj dwg gij cihsiz dou ngamq hag gvaq! Gvaiq mbouj ndaej lauxsae cungj dwg heuh boux gik doegsaw hwnjbae, dwg sawq gyoengqde geiq ndaej maenh gij cihsiz son gvaq haenx mbouj caengz……

Gienh saeh neix gaenq gvaqbae haujlai nanz lo, moix mbat dingq daengz vunz gangj “nyaeb ciengj”, gou couh ngeix hwnj mbat nyaeb ciengj hozdung ban dou hawj gou ciuhvunz nanzlumz neix.

（bouxlauxsae son’gyauq: Lungz Gingyi/龙庆煜）