Gou sou hwnj song ga, ndwn youq gwnz saeceijrin, nyinhnaeuz yiengh- neix couh ancienz lo. Caeklaiq Ah Gunh rag diuz nyecuk youq baihlaeng, duzngwz haenx lumjnaeuz hix miz di lau “faglem” Lij Bu, cij ca song sam cik yienghneix couh ndaej haeb Ah Gunh lo. Yaep he Ah Gunh song din baez sou, diuq hwnj daizcaeq mohrin, bin hwnj mohgungj. Ah Veij beij Ah Gunh vaiq geij yamq diuq hwnj mohgungj. Duzngwz haenx menh roengzdaeuj, nod daengz dieghoengq naj moh, ngiengxgyaeuj hwnjdaeuj, biq ok linxgaeq hoengzmaeq, caemh- caiq lij fat ok sing “cihcih”.

Ah Gunh、Ah Veij、Ah Giuh caeuq Ah Cang 4 boux vunz doxcomz youq gwnz mohgungj, mbeihung lo, cimyawj duzngwz hung, sing hung swenj:

“Moeb dai de! Moeb dai de!”

Gou bouxdog gyaxgedged ndwn youq saeceijrin baihgvaz dieghoengq naj moh, gizneix mbouj beij mohgungj sang, caemhcaiq liz duzngwz haenx youh gyawj, 1au ndaej gou daengx ndang unqniekniek, sing he hix cungj mbouj gamj ok.

“Moeb dai de! Moeb dai de!”

Gyoengqde youh hemq youh diuq, Ah Gunh lij vad “faglem”, vad ndaej yiengj “huhu”.

Aiq dwg vunz lai, duzngwz hung deng hwk lo, de gungjgoz aenndang, youq dieghoengq naj moh nod gvaengx he le, baez cienq gyaeuj, gingqyienz nod coh saeceijrin gou youq baihneix, aen sim gou fwt lumj deng riuj haeujdaeuj nei, giujdin hix saenz- gywggywg mbouj dingz, ca di ndwn mbouj onj.

“Ah Byauh, de bae haeb mwngz lo!” Ah Cang hemq hwnjdaeuj.

“Haeujsim!”

“Ndwn daengz gwnz gyaeuj saeceijrin bae……”

Gij sing hemq gyoengqde dungxliengz youh dwglau, hoeng gou gaenq faen mbouj ok dauqdaej dwg gij sing byawz lo, caenh roxnyinh ndaw rwz yiengjhumhum, naengbak mwnh- dwddwd, song ga youh nanq youh unq, aenndang bibi buengqbuengq, gaej naeuz yo ga bin hwnj gwnz gyaeuj saeceijrin bae lo, lienz baihlaeng saeceijrin bingzbwd hix ndwn mbouj ndaej maenh lo.

Duzngwz hung menhmenh gungj ndang raezrang hwnjdaeuj, loq ngiengxgyaeuj, youq gwnz rinbanj nod, cik he cik he nod gyawj gou baih- neix……

(caengz sat)