Youq henz dah laj bya, miz rangh sadan hausaksak ndeu. Gou gingciengz youq gizde guhcaemz, lohdin youq gwnz sadan byaij bae byaij dauq, gwnz sadan couh miz rizdin baenz aen baenz aen.

Sadan baenzneix seuq baenzneix cingh, dwg aenvih raemxdah ciengzseiz dongj swiq de bae ba? Sadan baenzneix unq baenzneix mboeng, dwg aenvih ciengzseiz miz duzbya saet hwnjdaeuj, lau duzbya deng sieng ba?

Gou youq ndaw ndoeng faexndoek gip ndaej lailai gyaepgya, coq haeuj ndaw raemxdah sawdikdik de bae, gyaepgya couh menhmenh lae deuz lo. Gyaepgya dwg aenruziq gou, aen’aen ruziq gou cungj coq miz ndaek rinreq miz saek wenjyupyup ndeu, dwg gaiqlaex gou.

Gou naemj, youq baihlaj gadah, youq giz gou mbouj rox de, goj miz sadan hausaksak. Gwnz sadan, goj miz lwgnyez ciengzseiz bae gizde guhcaemz, gaiqlaex gou couhdwg yaek soengq hawj gyoengqde. Mwh gyoengqde youq gwnz sadan gip ndaej aenruziq, aen’aen ruziq cungj miz ndaek rinreq gyaeundei ndeu, gyoengqde couh angqfaengz dahraix. Gyoengqde couh cam naeuz, gijneix dwg bouxlawz soengq hawj raeuz ne? Gyoengqde rox dwg gou lwi? Mbouj rox goj mbouj miz maz ne, guh gij saeh hawj vunz angqfaengz le, vihmaz yaek hawj vunz rox dwg swhgeij guh ne?

Gou goj gingciengz youq gwnz sadan deqcaj, muengh daj duenhgwnz gadah miz saek aen ruziq lae daeuj, aenruziq dwg mbouj dwg gyaepgya guh baenz goj mbouj youqgaenj ne; muengh ndaw aenruziq goj coux miz gaiqlaex soengq hawj gou, gaiqlaex neix dwg ndaek rinreq gyaeundei ndeu goj ndaej, dwg duj ndokva ndeu goj ndaej, gou itdingh angqfaengz dangqmaz, aenvih gaiqlaex neix dwg lwgnyez biengzgyae soengq hawj gou.

Daengz ngoenzneix, gou lij caengz ndaej sou gvaq gaiqlaex yienghneix, hoeng gou mbouj doeknaiq saek di, gou saenq miz saek ngoenz gou itdingh sou ndaej dahraix. Aenvih, youq duenhgwnz gadah, youq giz gou mbouj rox de, goj itdingh miz sadan hausaksak yienghneix dahraix, gwnz sadan goj itdingh gingciengz miz lwgnyez bae guhcaemz dahraix. Gyoengqde goj coq gaiqlaex haeuj ndaw aenruziq bae, hawj aenruziq riengz raemxdah lae daeuj daengz sadan biengz raeuz.

Gou yienznaeuz caengz sou ndaej gaiqlaex, hoeng gou naemj, ngoenzngoenz cungj miz lwgnyez biengzgyae aenvih sou ndaej gaiqlaex gou coq youq gwnz aenruziq de couh angqfaengz, yienghneix, gou ngoenzngoenz cungj guh gij saeh hawj vunz angqfaengz de, gou couh caemh angqfaengz lo.

（Daj《Bonjsei Sim Lwgnyez》（Veiz Gizlinz raiz）senj okdaeuj, Lwgfwngzmeh/卢奋长 hoiz）