Gangj daengz baez daih’it cien gyaeqgaeq, caen miz di ndeiriu.

Miz baez ndeu, daxboh daxmeh mbouj youq ranz, cijmiz gou boux ndeu youq ranz. Daengz banringz lo, daxboh daxmeh lij mbouj caengz maranz, gou dungx iek ndaej aen- dungx yiengjngingo, muengh daxboh daxmeh vaiq di maranz, hoeng baenz- lawz muengh cungj mbouj raen gyoengqde dauqma. Baenzlawz guh ne? Gou sijsaeq baez naemj, gietdingh hag gij yienghceij daxmeh, cien gyaeqgaeq soengq haeux gwn.

Yienghneix, gou dawz aenrek swiq seuq, daj ndaw binghsiengh dawz aen gyaeqgaeq ndeu okdaeuj. Gou sien dawz aen cauqmeizgi haifeiz, gij feizmbaw sikhaek dawz hwnjdaeuj, lij yiengjhuhu dem. Sikhaek, rek ndat lo, gou raix youz roengz ndaw rek bae, gij youzdiemj sinz ok baihrog, gou mbouj guenj samcaet ngeihcib’it, couh dawz gyaeqgaeq cuengq roengz ndaw rek, vanq gyu coq baihgwnz, yienzhaeuh yungh dietcanj dawz gyaeqgaeq fan gvaqdaeuj, yungh canj baez at, hakhenj couh conh okdaeuj. Gou couh itcig fancauj, aen“gyaeq- hozbauh”bienqbaenz“gyaeqhuz- bauh” (aen’gyaeq remj youh maix). Mboujgvaq gou hix nyouqdaengz gij hom gyaeqgaeq lo, myaiz yaek rih okdaeuj lo. Gou ganjgaenj gven feiz, dawz gyaeqgaeq daek roengz ndaw vanj bae. Gou sikhaek cimz gaemz ndeu, hamzcidcid, nyaij hwnjdaeuj lij miz di byukgyaeq. Aen“gyaeqhoz- bauh” neix dwg aen’gyaeq ceiq hoj gwn gou gwn gvaq lo.

Seizhaenx daxboh daxmeh dauq ranz lo, daxmeh cam:“Ndaw ranz miz gijmaz feihdauh remjrat?”Gou couh lauxsaed lwnh daxmeh nyi. Gou laihnaeuz daxmeh yaek ndaq gou, hoeng daxmeh mboujdan mbouj ndaq gou, caemhcaiq dajciengj gou, heuh gou caiq sawq baez ndeu.

Gou gietdingh caiq sawq baez ndeu. Gou geiq ndaej gij gingniemh baez gonq, gou couh haeujsim bae guh. Gyu coq noix di, feiz hai iq di, menh di fancauj, dahraix, aen “gyaeqhozbauh”gig ndeiyawj cien okdaeuj lo. Daxmeh haenh gou coengmingz youh akguh. Gou angq ndaej bak riu mbouj haep.

Baez daih’it cien gyaeqgaeq caen mbouj yungzheih! Gou itcig geiq gij vah daxmeh gangj haenx：Fanhsaeh haidaeuz nanz, cijaeu haeujsim bae guh, couh bienq ndaej sugseg lo!

（bouxlauxsae son’gyauq：Vangz Gveiyangh/黄桂香）