“Ciet sam nyied sam neix mbouj doengz, haeuxnaengj haj saek caeuq doubiz.” Ndwen 3 ngoenz 26 dwg “sam nyied sam” ngoenzciet conz- dungj Bouxcuengh Gvangjsih, aenvih binghraq yingjyangj, bi 2020 cujyau dwg guh gwnz muengx hozdung, yienh’ok gij daegsaek “sam nyied sam mbouj doengz yiengh, gwnz muengx doxcomz hix ndeiyawj”, doiq aen doih canghyw Gvangjsih bang Huzbwz hoenx binghraq lij youq Vujhan、Sizyen daengj dieg daeuj gangj, gyoengqde couh youq gizhaenx gvaq sam nyied sam, guh “aen faen- hoihciengz Huzbwz” .

Sizyen dwg aen hawsingz Gvangjsih gapdoih bangcoh, aen doih canghyw dauqma Gvangjsih le, Gvangjsih 20 boux duiyenz cizgung aenvih guhhong aeuyungh laebdaeb louz youq gizhaenx. Ndwen 3 ngoenz 26 banhaet, gyoengqde gag roengz fwngz cawj le youzcaz, lij ndatcingz doigvangq gaisau “sam nyied sam” hawj gyoengq baengzyoux Sizyen.

“Eu fwen lo, baihneix eu daeuj baihhaenx doiq……”Youq ngoenz doekgonq “sam nyied sam”, aen doih canghyw Gvangjsih buek daihseiq bang Huzbwz hoenx binghraq guh sat le gij yinvu gyoengqde youq Vujhan Hezhoz Yihyen Sihyen haenx, couh youq gizhaenx yietnaiq. Couhcinj youq Huzbwz gyae’gyang， dauqranz mbouj ndaej, “sam nyied sam” eu fwen cungj saeh neix, noix mbouj ndaej. Yienghneix caezgya guh hwnj le aen faenhoihciengz Vujhan “sam nyied sam”, gyoengq duiyenz Gvangjsih Cunghyihyoz Dayoz Fusuz Suigangh Yihyen caeuq Gvangjsih Gozci Ywcuengh Yihyen, youq dieggvangq aen diemqlaeuj youq haenx doiq fwen、doxsoengq aendomq. Gyoengqde lij ndatcingz cingj gyoengq doengzhangz Vujhan: Bimoq daeuj daengz Gvangj- sih, raeuz fwngz daz fwngz、caez eu fwen.

Haeuxnaengj haj saek noix mbouj ndaej, doubiz dwg gaiq buenx ndei. Doubiz dwg gijgwn ndei Vujhan, vunz dangdieg moix ngoenz gwn haeuxromh aeu gwn. Vunz guhhong aen diemqlaeuj aen doih canghyw Gvangjsih buek daihseiq youq haenx, roxdaengz vunz Gvangjsih gvaq “sam nyied sam” gvenq gwn haeuxnaengj haj saek le, cienmonz hwnj muengx bae hag guhfap, lij bae ra cawx yienzliuh, guh ok le haeux- naengj haj saek.

(Hih Cinhaij)