Ndwen 3 ngoenz 26, bi 2020 Cungguek Mbanjcuengh·Vujmingz “sam nyied sam Bouxcuengh” hawfwen gwnz muengx hozdung youq Gvangjsih Nanzningz Si Vujmingz Gih hainduj. Caeuq bi wnq mbouj doengz, aenvih binghraq yingjyangj, aen hozdung bi 2020 Vujmingz Gih angq- hoh “sam nyied sam” yungh gij hingzsik gwnz muengx doiq fwen, cauh’ok “hawfwen gwnz muengx”, hawj vunzlai mbouj yungh okdou caemh ndaej roxnyinh gij yinxdaeuz fwen.

Hozdung hainduj le, 13 boux canghfwen yanghcin ndang daenj buhvaq minzcuz, faenbied youq gyaeuj giuz、henz dah、laj gorungz、henz diengz、ndaw gunghyenz, guh doiq fwen. Henz dah laj faex, coenz dem coenz fwen goksasa, hot dem hot fwen hoenghhwdhwd. Gyoengqde youq dangdieg majhung haenx, yungh fwen gangjok gij roxyiuj caeuq swnjcienz “sam nyied sam” ngoenzciet conz- dungj Bouxcuengh.

Vujmingz Gih Dangjveij Cangz- veij、Senhconzbu bucangj Bangz Cenzveih naeuz, canghfwen gak dieg faenbied youq ranz lienzsienq doiq fwen, ciengqgok fwen haenh lanzhoenx binghraq、eu fwen vut gungz gunggeng, angqhoh sam nyied sam Bouxcuengh mbouj doengz yiengh.

Youq aen faenhoihciengz dieg- goek swnjcienz feihyiz Vujmingz, canghgo Mbanjcuengh Liengz Cau- gyangh yienjciengq go Vahcuengh gagcauh 《Lwgminz Vujmingz Cauh Mbanjmoq》, ciengqok gij bienqvaq moq Vujmingz lajmbanj moq bienqvaq hungloet. De naeuz：“Vahcuengh miz gij daegsaek bonjfaenh, gangjvah couh lumj ciengqgo nei.” Ciuq gij daegsaek Vahcuengh, de gyahaeuj riuzhingz vwnzva yenzsu gaijbien fwen, aeu go gagcauh cienz hwnj gwnz muengx le, miz haujlai vunz maij dingq.

Ciuq cam rox, lwgminz Vujmingz gyaez eu fwen、bae hawfwen lizsij ndaej ra goekrag daengz Nanzcauz. Baez daengz ngoenz hawfwen ndwen- sam, Vujmingz vunzlai gak dieg couh baij daizngaiz dakdaih caencik baengzyoux daeuj hawfwen haenx, gwn ngaiz le youq gyanghongh ranz bonjfaenh roxnaeuz bakmbanj、henz dah、gwnz bo daengj doiq fwen, doxcam doxdap.

Daj bi 1980 hainduj, Vujmingz gaenq laebdaeb 40 bi banh “hawfwen” sam nyied sam.

(Vangz Gunghyau)

①Nanzningz Si Siusiengh Siujyoz haiguh “sam nyied sam mbouj doengz doengzsim hoenx binghraq” cawjdaez gwnz muengx hozdung, yungh cungj fuengsik mbouj doengz neix angq gvaq cietndei. Ndaw doz dwg hagseng langhbaij aendomq.

(Moz Siuniz Vangz Sauvaz Cangh Cenyiz/莫秀妮 黄少华 张倩怡)

②Ndwen 3 ngoenz 26, vunzlai Lungzswng Gak Cuz Swciyen Swsuij Yangh Couhgyah Cunh doxduenq gekleiz, guh ceiz、diuq foux、cimz youzcaz, angqhoh “sam nyied sam Bouxcuengh”.

(Banh Cisiengz/潘志祥)

③Ndaw doz dwg ndwen 3 ngoenz 26 Duh’anh Yauzcuz Swciyen Gauh- lingj Cin ranz nungzhoh ndeu guh haeuxnaengj haj saek, angqcoux “sam nyied sam”.

(Hanz Ginhcinz/韩金秦)