Ndwen 3 ngoenz 10, Hocouh Bingzgvei Gih Vwnzvaz Hagdangz vihliux hawj hagseng ban Yauzdoj gibseiz lingx daengz saw moq, banh hozdung soengq saw haeuj Mbanjyauz. Bouxdaeuz caeuq lauxsae ban Yauzdoj faen baenz 6 aen cuj, dawz saw moq haggeiz seizcin bi 2020 soengq daengz gwnz fwngz lwgnyez Yauzdoj 6 aen mbanj Yauzdoj Bingzgvei Gih gig gungzhoj haenx.

Mboengqneix, 3000 lai boux hagseng itcig youq ranz doenggvaq vangjdoxlienz hagsib, gyoengqde laebdaeb aeu ndaej saw moq haggeiz seizcin bi 2020 lo. Hoeng aenvih bungz seiz binghraq, hagseng ban Yauzdoj Vwnzvaz Hagdangz, mbouj ndaej bae daengz hagdangz lingx saw moq. Bouxdaeuz Vwnzvaz Hag- dangz baengzgawq yawhfuengz gaemhanh sinhgvanh feiyenz hingzseiq caeuq son’gyauq fugsaeh yauhgiuz, gibseiz bang hagseng Mbanjyauz, guh “hozdung soengq saw haeuj Mbanjyauz”, baujmaenh hagseng Mbanjyauz gibseiz aeu ndaej saw moq.“Aeu ndaej saw moq, gou mbouj youheiq vangj mbouj ndei mbouj ndaej youq gwnz vangjdoxlienz hwnjdangz lo.” Hagseng Ya Lanz naeuz.

Vwnzvaz Hagdangz guh hozdung soengq saw neix, mboujdan baujmaenh hagseng hagsib, lij rag dep hagdangz caeuq cawjranz、 hagseng. Cawjranz gamjgik hagdangz, baujcwng guenj ndei lwg bonjfaenh, engqgya haeujcoengh hong hagdangz.

(Gyangh Vanjyingh/姜晚英 Moz Gyanghfung/莫江凤)