Dou dawz gij dieghoengq naj moh dangguh daizheiq, hix dangguh cancangz, Ah Cang vad ngafaex, dwg ngw gij yienghceij Liuz Bei gwnz daizheiq hane, rox bongh rox doiq, lumj bouxciengq. Hoeng diuz ngafaex de dinj lai, yawjngoengngoeng deng gij nyecuk raezrang Ah Gunh dawz bik ndaej cij rox dangj mbouj rox vanzfwngz doxdauq, gwnz ndang laebdaeb deng fad le geij mbat, doiqlaeng foedfoed. Ah Giuh youq henz ngonzyawj sawqmwh mbouj bekfwngz lo, mbouj rox daj gyawz ra ndaej gaiq benjnduk he, baez yung couh bongh gvaqbae, song fwngz yaengx gaiq benjnduk haenx, dingj gij nyecuk Ah Gunh dawz, daih hat sing ndeu:

“Deng caxcinghlungz gou mbak baez he!”

Ah Gunh ngawh baez he, ciep- dwk couh riuhaha hwnjdaeuj, engq haenqrengz bae vad nyecuk, vang bangx veq fad, doq dingj gij ngafaex Ah Cang caeuq gaiq benj Ah Giuh, doq hemq:“Hei! Lij Bu hoenx sam bouxak! Sou Liuz、 Gvanh、 Cieng sam beixnuengx caez daeuj gou hix mbouj dawz haeujsim!”

De baez haenqrengz, gaj ndaej cingq mizyinx, ndaw fwngz vad nyecuk yiengjhumhum. Gij seiqdaeuz Ah Giuh yienznaeuz hujdengdeng, hoeng gaenlaeng mbouj mizrengz, song fwngz de yaengx gaiq benjnduk haenx, youh hung youh naek, mbouj lingzvued. Gij ngafaex Ah Cang yienznaeuz gig ndei yungh, hoeng dinj lai, caiqlix de gaenq hoenx le haujlai nanz, baegfofo, ndigah yienznaeuz songde boux naj boux laeng gabhoenx Ah Gunh, hoeng lij mbouj ndaej hingz.

“Cieng Feih ne? Cieng Feih…… Vaiqdi daeuj ha!”

Ah Giuh hemq dwk, muengh coh baih gou caeuq Ah Veij youq, gou daengx roengz “gij sing gyong”, doiq Ah Veij ndiengqndiengq bak, naeuz:

“Ah Veij! Mwngz guh Cieng Feih! Vaiqdi bae hoenx!”

“Gou dwg Gungj Mingz!” Ah Veij veqveq gyaeuj:“Mwngz bae hoenx ba! Hawj mwngz guh Cieng Feih!”

Gou yawjraen Ah Gunh hoenx ndaej Ah Giuh caeuq Ah Cang fouzfap vanzfwngz, yaek bang songde okheiq, sikhaek diuq hwnj giuzmoh, ngeix ra ngafaex guh fagnangx, cang baenz Cieng Feih bae hoenx, bang Ah Giuh caeuq Ah Cang dwkbaih Ah Gunh, hoeng itseiz cix ra mbouj raen gij ngafaex faexgyaengh doenghgij doxgaiq neix, ndawsim ngeix ceiq ndei dwg ra ndaej diuz faexsaux daeuj, youh raez youh mbaeu, itdingh hawj Ah Gunh gwn hoj cimz haemz!

(caengz sat)