“Raeuz gizneix mbouj miz maz Leizsinzsanh, mbouj miz Hoj- sinzsanh, hix mbouj miz Cungh Nanzsanh, danghnaeuz byawz mbouj ciuq gvidingh banhsaeh, couh cij ndaej ram hwnj bya bae moekmag!” Gij byauhyij fangzgung sinhgvanh feiyenz lij daengj youq bak mbanj. Binghraq sinhgvanh feiyenz lij caengz sanq, lij gyuemluemz youq ndawbiengz.

Rumzcin cififi, gij rum rog cueng bienq ndaej heuswdswd lo, ndit cin raeuj vunz, duzgoep seizdoeng hix nyaenx mbouj ndaej daj ndaw congh iet gyaeuj okdaeuj lo, youq laj yiemhranz, roegenq heuh mbouj dingz. Geij ngoenz neix, Vujhan mboujduenh cienz siusik ndei daeuj, vunzlai cungjsuenq ndaej soeng gaemz heiq lo, gak daih gunghcangj giyez、cauhsi、bouq hix youq cwngfuj anbaiz lajde miz diuzleix haihong lo.

L yienh dwg youq henzgyaiq baihnamz guek raeuz, dwg aen yienh iq ndeu, Hizcingz Faenjdiemq youq baihnamz ndaw singz, seizneix, rog dou seiz mbouj seiz miz mbangj hek daeuj gwn ngaizromh, daihgya cungj gag rox gek mij haj doxhwnj. Bakdou laeb aen daiz cienmonz rau ndangraeuj ndeu, daihgya gonqlaeng rau gvaq ndangraeuj le cij ndaej haeuj ndaw diemq bae gwn faenj. Youq ndaw ranzcauq, bouxgaifaenj daep goujcau cingq nyaengqfoedfoed hawj bouxhek cawj faenj. Boux gwn faenj hix gag rox youq henz congz gek mij haj doxhwnj.

Gij lwgmbauq lwgsau cingq baiz doih, miz dah sau he cam daeg mbauq henz he:“Mwngz dwg daj gyawz daeuj ha?”

“Gou daj Liujcouh daeuj, mwngz ne?” Lwgmbauq gek aen goujcau naeuz.

Boux lwgmbauq cingq gwn faenj ndeu coh aendaiz laenzgaenh dahsau cang ndaej seizhwng nyumx byoem henj dap vah naeuz:“Hai, dahsien, mwngz daj gyawz daeuj ha?”

Dahsau nyumx byoem henj ngiengxgyaeuj naeuz:“Gou, gou, gou dwg daj Vuj……” Vah caengz gangj sat cix sawqmwh laebdaeb ae geij mbat mbouj dingz.

Gij sing ae’ngab neix couh lumjnaeuz mbwn ndit byajben nei, daegmbauq haenx baez saemxsax he, couh gipmuengz goemq bak ndoj gvaq mbiengj he bae. Gij vunz cingq baiz doih hix goq mbouj ndaej caj gwn faenj lo, doq heuh:“Ha! Mwngz dwg daj Vujhan dauqma ha?” Gij sing soem hemq lumj cim nei saek haeuj rwz vunz bae. Daengx aen diemqfaenj luenhlablab hwnjdaeuj lo, gyoengq bouxhek sikhaek buet deuz caez lo, dan ndaejnyi “dangh langh” sing ndeu, yenzlaiz dwg aen cok ndaw fwngz bouxcawjfaenj doek roengz gwnznamh.

Lauxbanj diemqfaenj sawqmwh roxnyinh gij cingzgvang mbouj deng lo, daep dwk goujcau sikhaek fokndaq naeuz:“Saulengj ha, mwngz dwg daj Vujhan daeuj ma?”

“Mbouj, mbouj, mbouj dwg ne, gou, gou dwg daj Vuj…… Vujlingz daeuj.”

“Mwngz couh naengh youq gizhaenx, daep goujcau ciengeiz gaej doengh bw!” Gangj le, lauxbanj diemqfaenj doq dawz soujgih okdaeuj daj denva hawj yihyen.

Gvaq le yaep ndeu, gij singdig 120 yiengj doh gwnzmbwn baihnamz ndaw singz, daj gyae daengz gyawj, cingq coh Hizcingz Faenjdiemq ganj daeuj.

Daengz lo, doengh boux canghyw youq gwnz aen cigiuhu daenj buh fuengzre riengjret roengz ci, cigciep cung haeuj ndaw diemq bae cam dah nyumx byoem henj haenx.

Dahsau nyumx byoem henj gejnaeuz:“Gou, gou dwg daj Vujlingz Yangh daeuj, caen mbouj miz ma vwndiz, haxbaenh dwg daegmbauq he cam gou daj gyawz daeuj, gou cingqngamj deng saekndaek, vah caengz gangj sat couh ae le geij sing. Baenzneix caezgya couh simvuengz hwnjdaeuj lo.”

Boux husw ndeu naeuz:“Seizneix dwg mboengq seizgeiz youqgaenj, vihliux hoenx hingz binghraq, mwngz lij dwg hwnj ci caeuq dou bae yihyen guh genjcaz baez he ba!”

Gij singdig 120 yied daeuj yied bienq iq, cigiuhu hai bae yihyen lo. Lauxbanj diemqfaenj raen le cij soeng gaemz heiq ndeu. Cekfan mbat ndeu, bouxhek deuz caez lo, seng’eiq hix guh mbouj baenz lo. Hoeng. riengz- laeng de youh nyaengq hwnjdaeuj lo, de caeuq lajfwngz yungh ywraemx siudoeg dawz daengx aen diemq ndaw rog cungj byoq mbat ndeu, cij gven dou hung aen diemq hwnjdaeuj.

Lauxbanj diemqfaenj gag ngeix: Aen seizgeiz yungyiemj neix, vihliux gij ancienz daihgya, seng’eiq mbouj guh couh suenq lo. Gou aeu seizseiz singjgaeh, miz maz mbouj deng couh bauq hawj baihgwnz bae! Maqmuengh dah sau neix mbouj miz maz bw, dou geij boux ndaw diemq guhhong youq gizneix ra ndaej goj gekliz, haetneix baenzlai bouxhek daeuj gwn faenj, bae gyawz ra ndaej gyoengqde dauq genjcaz?”

Vah naeuz, Dahsau nyumx byoem henj haenx deng daiq bae daengz yihyen le, doq miz gingjcaz daeuj bang diucaz. Yenzlaiz de caen dwg daj Vujlingz Yangh daeuj, daeuj L yienh aen cangj dajgoeng, mbouj dwg daj swngj wnq daeuj, hix mbouj ok swngj gvaq. Mbouj fat ndat, hwzsonh genjcwz baenz singqyaem, mwhneix, ndaek rin ndaw sim doengh canghyw cij roengz gwnznamh.

Yenzlaiz, boux dahsau neix youq diemqfaenj cawx vanj faenjlwgsae daeuj gwn, bouxgaifaenj cuengq lai manh, de nyinhnaeuz bonjfaenh lij gwn ndaej couh laebdaeb gwn lo. Doeklaeng miz daegmbauq he cam vah, de gangj ndaej di fwt deng saekndaek, ae le baenzroix, seizneix cingq dwg seizgeiz yungyiemj, bouxboux cungj gaenjcieng, cij miz gij saeh neix okdaeuj.

Loengh le byongh ngoenz, gyo- ndaej mbouj miz maz saeh hung. Doeklaeng, lauxbanj diemqfaenj roxnyinh doiq dah sau neix mbouj gvaq, couh hawj de youq ndaw diemq gwn faenj baenz ndwen mbouj aeu cienz. Dah sau neix hix lijgaij gyoengqde baenzneix guh, gangjmingz caezgya gig yawjnaek fuengzre binghraq sinhgvanh feiyenz.

Liuh mbouj daengz, gij saeh neix mbouj daengz ngoenz he couh cienz doh ndaw singz, engq lai bouxhek daeuj diemqfaenj neix gwn faenj, aenvih gyoengqde nyinhnaeuz boux lauxbanj aen diemqfaenj neix gig fucwz caemhcaiq simndei.