Bonjbauq siusik (gicej Vangz Sinhyingj/王新颖） Ndwen 3 ngoenz 16, bi 2020 “sam nyied sam Boux- cuengh·aen ciet angq Betgveiq” aen hoih fatbouh sinhvwnz youq Namz- ningz banh. Aen hoih fatbouh gaisau le bi 2020 “sam nyied sam” cujyau hozdung neiyungz caeuq couzbwh cingzgvang.

Bineix dwg bi cienzmienh hwnjguh baenz aenbiengz siujgangh caeuq bi satbyai “cibsam haj” gviveh, dwg bi daihseiq swcigih dangjveij、cwngfuj dajcauh “sam nyied sam Bouxcuengh·aen ciet angq Betgveiq” vwnzva lijyouz siufeiq binjbaiz, hix dwg bi youqgaenj gyavaiq doicaenh hwnjguh dieg ak vwnzva lijyouz. Vih gaenxmaenx wngq- doiq binghraq yingjyangj, bineix yaek hopheux aen cawjdaez “hoenx bingh- raq、buet siujgangh、baenaj seizdaih moq”, yienh’ok gij daegsaek “sam nyied sam mbouj doxdoengz, gwnz muengx comz hix gyaeundei”, yungh gwnz muengx guhdaeuz, banh “sam nyied sam Bouxcuengh·aen ciet angq Betgveiq” vwnzva lijyouz siufeiq binj- baiz baenzdauq hozdung, youq mwh youqgaenj hoenx binghraq, cauh’ok gij heiqfaenh ngoenzciet baenaj、raeujrub、nauhyied, fungfouq gij ndwenngoenz cingsaenz vwnzva vunzlai, bangdoi dauq haihong guhhong.

“Sam nyied sam Bouxcuengh·aen ciet angq Betgveiq” comz guh seizgan dwg ndwen 3 ngoenz 26 daengz ndwen 4 ngoenz 26, baugvat “sam nyied sam Bouxcuengh·heiqfaenh Mbanjcuengh noengz”“sam nyied sam Bouxcuengh·angj minzcuz dijyuz”“sam nyied sam Bouxcuengh·doxduenq youz Guengj- sae” “Guengjsae gyaeundei·ciet ndwenngoenz raeuj sim sam nyied sam”“sam nyied sam Bouxcuengh·doxhuz youq Betgveiq” haj aen banjgvai, ndawde, vih comz rengz、saenqhwng siufeiq, bineix “muengx e angq cawx” banjgvai swnggaep baenz “ciet ndwen- ngoenz raeuj sim sam nyied sam”, yaek laebdaeb daengz ndwen 5 ngoenz 26, hawj saedyienh aen moegbiu raeuj sim、raeuj haw、raeuj ndwenngoenz. Ndwen 3 ngoenz 26 “sam nyied sam” ngoenzhaenx, yaek cingqsik hainduj aen hozdung “sam nyied sam Bouxcuengh·aen ciet angq Betgveiq”, caemhcaiq youq Guengjsae Gvangjbo Densidaiz、Guengjsae Sinhvwnzvangj daengj doiok cezmuz daegbied, hawj gyoengq vunzlai youq ranz hix ndaej roxnyinh gij heiqfaenh noengz- nwd angqgvaq ngoenzciet minzcuz conzdungj.