“Ndaw rongz roeglaej henz miuh.”

“Ha!” Gou doeksaet yat, dungx- mbouq cam:“Duz neix baenzlawz youq ndaw rongz roeglaej?”

“De ndonj haeuj ndawde bae gwn gyaeq roeglaej caeuq roeglaej iq.”

“Dou lij ciengzseiz bin hwnj gwnz ciengz iet fwngz daengz ndaw rongz roeglaej bae aeu gyaeq de ne!”

“Gvaqlaeng aeu haeujsim lo, danghnaeuz gij lwgfwngz mwngz deng haeb gaemz ndeu mbouj dwg gangjriu lo.” Aulungzgveiz doq daengq gou doq daj ndaw daeh mbon gep bohliz he, gvej hoz duzngwz, duz ngwz haenx mbitmbieng ndaej engq haenq lo, Aulungzgveiz fwngzswix nep gaenj diuz rieng de, hob naengbak, lumj- naeuz gig roengzrengz.

“Aeu mbouj aeu gou daeuj bang mwngz?” Gou lumj deng dub naj gawh le hixnaengz cang bouxbiz nei, mbeihung cam de coenz he.

“Mbouj aeu.” Aulungzgveiz bibi gyaeuj.

Caeklaiq de baenzneix naeuz, danghnaeuz de caen heuh gou bang gaem diuz rieng duzngwz, gou couh yaek saetnaj lo.

Geiq ndaej geij ndwen gaxgonq, gou caeuq Ah Veij、Ah Cang、Ah Gunh、Ah Giuh geij bouxnyez youq mohrin duh singq Linz laeng lajbya guh’angq. Mohrin haenx gig gvangq, beimoh baihlaeng dongq hwnj moh, gij yienghceij lumj baihlaeng duzdaeuh, dou heuh gizde guh mohduzdaeuh, aeu suijniz caep baenz, gij moh gizyawz cungj dwg aeu benjrin bu hane. Dangqnaj aen moh miz gaiq dieg bingzrwdrwd caemhcaiq hoengqvatvat he, song henz lij miz saeceijrin caeuq mbaeklaerin, benjrin deng ndit dak ndaej ndatcik. Daengngoenz lij maeuq youq gwnz dingjbya mbouj haengj roengzbae, dou geij boux lwgsai nienzgeij ca mbouj lai, langh vaiz caeuq yiengz youq gwnz bo gwn nywj, caezgya mbouj aeu doxiu, couh gyoebcomz youq gizneix. Ah Cang ndaw fwngz gaem diuz ngafaex, Ah Gunh gip le nyecuk, song vunz couh doxdaj hwnjdaeuj. Ngafaex guh giemq, nyecuk dangq lem, baez bag baez camx, mwngz daeuj gou vang, daeuq ndaej haenqrengz raixcaix, ndaw bak gou mbouj dingz hemq:

“Dung dung dung dung……”

“Sing gyong” mbouj daengx, hoenxciengq haenqrem.

Ah Veij caeuq Ah Giuh doq bekfwngz doq hemq:

“Gaj! Gaj! Gaj!……”

Youq ndawsim dou, lumj yienghneix guhcaemz mbouj miz maz gamhanh caemhcaiq mbouj miz vunzhung daeuj guenj, dwg mwh ceiq sim’angq ndaw ngoenz lo, seiqhenz mbouj miz maz vunzhung, hix mbouj miz nuengx dangj fwngz gaz ga, cij miz rum, gofaex, ndit caeuq rumz, byawz hix mbouj gaz daengz byawz, vaiz yiengz swngz daengngoenz caengz roengz bya, daegbied haeujsim bae gwn go’nywj, nyaengq ndaej gyaeuj hix mbouj ndaejhoengq ngiengx baez he.(caengz sat)