Mbatneix cibgeij ngoenz youq ranz yahdaiq, moix ngoenz gijgvangq hozdung mbouj mauhgvaq 100 mij. Mbouj dwg youq ndaw ranz, couhdwg daiq lwgnyez bae diegdangz guh- caemz. Gizhaenx gvangqlangh mbouj miz vunz, lij miz bang gaeq gyoengq lwgnyez ceiq maij dem, bang gaeq youq gizhaenx byaij bae byaij dauq, ra gwn caeuq doxdot guhcaemz, cwxcaih dangqmaz.

Bang lwgnyez neix youh iu youh manz, ngoenznaengz mbouj miz maz saeh, cij siengj dawz nye gosangh bae gyaep bang gaeq buet bae buet dauq. Bang gaeq gig hojlienz, linj ndaej dauqcawq mbin deuz, gyoengq lwg- nyez dauq angqvauvau riengz youq baihlaeng, gikdoengh ndaej daih hemq daih swenj, nauhyied dangq- maz.

Haemhlwenz gaenq doek fwn gvaq, gwnz diegdangz vanzlij comz miz haujlai raemx, dauqcawq dumz- dwddwd. Yienznaeuz giz mbouj cuengq doxgaiq hawq di, hoeng, haujlai giz doi miz fiengznyangj, baez yamqdin roengzbae, lij dwg raemx- gwkgwk. Doengh gij dieg neix, cingq dwg gij dieg bang gaeq ceiq maij bae ra gwn doxding.

Banhaet hwnqdaeuj, swnh gou riengx bak swiq naj, gyoengq lwgnyez youh buet bae diegdangz gyaep gaeq lo. Mbouj geij nanz, dahlaux gou couh yenjyakyak buet ma lo, aenvih haiz caeuq vaq de cungj dumz caez lo.

Gou yawj le daej riu cungj mbouj baenz, ganjgip bang de vuenh haiz rieg vaq. Ngamq rieg ndaej, de youh yaek buet okbae. Yahnax lanz de cam:“Mwngz yaek okrog bae guh maz?” De gikdoengh naeuz:“Gou siengj caiq bae gyaep gaeq.” Gou cij ndaej daengq de, caj gwn ngaiz le caiq bae. De daejnganga mbouj dingz, swngzgei youh buet okbae lo, Yahnax cij ndaej gaen baihlaeng ganq gyoengqde.

Daengz seiz gwn ngaiz, gyoengq- de cij ma ranz, Yahnax ingj le geij mbaw siengq, fat youq ndaw ginz- veihsin. Gou daj mbaw siengq yawj- raen mbwn gaenq doek fwn gvaq, dahlaux byaij daengz diegdangz caeuq bang gaeq doxnyangz le, doq angq- fwngfwng gyaep bang gaeq hwnj gwnz ciengz, roxnyinh gig mizyinx, nyaenx mbouj ndaej eu hot fwen ndeu hwnjdaeuj:

“Aenmbwn doek fwn gvaq,

Dahlaux gvaq diegdangz;

Nem duzgaeq doxnyangz,

Gyaep hwnj cangz(ciengz) guh- caemz.”

Youq ndaw ginzveihsin, Mbauq- loeg gig vaiq couh han hot fwen:

“Duzgaeq lau deng gaj,

Duzduz gaq gwnz cingz(ciengz);

Mbouj gamj youq diegbingz,

Aeu guhringz couh dai.”

Gou yawjraen gij gaeq Goengseiq ciengx cungj gig hoenghfwdfwd, cawj le haengjdingh gig ndeigwn. Lwgbawx Goengseiq ndwen laeng couh yaek seng lwg lo, Goengseiq vih neix yunghsim ciengx le bang gaeq neix, gou siengj daengz neix couh han Mbauqloeg:

“Goengseiq ciengx ndei gaeq,

Gyaeundei youh baenz gvai;

Yawjraen couh ndwnj myaiz,

Ciengx ce ngaiz ndawndwen.”

Yaep ndeu, Mbauqloeg ciep hwnj lo:

“Goengseiq miz giva,

Hai va dawz mak daeuj;

Yienghyiengh miz vunz caeuq,

Dem ding raeuz couh angq.

Danghnaeuz myaiz caen lae,

Gaj geij duz hix ndaej;

Ciengx miz baenzlai gaeq,

Aenndang bouj ndaej vaiq.”

Gou laebdaeb eu:

“Goengseiq ciengx lai gaeq,

Duzduz baenzneix baeux;

Seiz Mbauqloeg gvaqdaeuj,

Gaj geij duz daeuj daih.”

Mbauqloeg han:

“Lau bae daengz henz mbanj,

Mbouj gamj heuh haeuj ranz;

Hoenx binghraq gannanz,

Nanz doxcomz gwn can.”

Gou youh eu:

“Seizneix cingzgvang ak,

Youq ranz gag youq ndei;

Caj hoenx hingz bingh neix,

Caiq baij daiz caez gwn.”

Mbauqloeg youh ciep eu:

“Gyaeng ranz cibgeij ngoenz,

Mumh baenz boengj bienq raez;

Binghraq gvaq bauz caez,

Menh caiq bae guhdoih.”

Gou daeuq mizyinx le:

“Bouxboux cungj raen mbaet,

Ngoenzngoenz vaet youq ranz;

Mbouj ok bakdou ranz,

Nanz rox yiengh daengngoenz.”

……

Couh yienghneix, gyoengq lwgnyez youq diegdangz gyaep gaeq guhcaemz, geij boux laux fouz eiq youq ndaw ginzveihsin daeuq geij hot fwen ranzmbanj, hawj caezgya dem miz haujlai yinxdaeuz.

Caensim maqmuengh binghraq ndaej sikhaek gvaqbae, sojmiz fuk- dauq lumj gaxgonq, caezgya ndaej caenhcingz yiengjsouh gij saedceij angqyangz, caeuq gyoengq caencik baengzyoux doxcomz guhdoih gangj- gangj riuriu.