Veiyenz lwgda hung youh gyaeundei, hoeng mbouj miz cingsaenz, naj de luenzlulu gig dwggyaez, hoeng cungj yienj’ok di youheiq ndeu. Gou gag cai ngeix gojnwngz caeuq aen ranz de mizgven: Bohmeh lizvwnh, de caeuq daxboh youq, daxboh de coengzlaiz mbouj raen riu, mbouj gangj saek coenz vah. Deng gijneix yingjyangj, Veiyenz coengzlaiz mbouj youq gwnz ban gangjvah, fajnaj de cungj saepsetset.

Guh boux banhcujyin Veiyenz, gou dajsuenq byaij haeuj ndawsim de bae, hoeng cungj mbouj rox baenzlawz guh cij deng, de nienzgeij iqiq, gaenq dawz gij sim daep haeuj. Doeklaeng gou rox daengz ndaw ban Manlinz、Bozsiengh caeuq Veiyenz ranz liz ndaej gig gyawj, caemhcaiq Manlinz caeuq Bozsiengh singgwz cungj haemq hailangh. Yiengh- neix aen siengjfap ndeu sawqmwh miz okdaeuj, danghnaeuz gyoengqde sam boux baenz baengzyoux, Veiyenz dwg mbouj dwg gojnwngz bienq ndaej lai hailangh di ?

Yienghneix gou gujli Manlinz caeuq Bozsiengh, sawq caeuq Veiyenz guh baengzyoux. Youq ndaw hagdangz, Manlinz caeuq Bozsiengh ciengzseiz cawjdoengh heuh Veiyenz itheij guhcaemz, ndaw ban miz hozdung seiz caemh heuh Veiyenz, cuengqhag le lij heuh Veiyenz itheij ma ranz, itheij sij cozyez. Ngamq hainduj, Veiyenz doiq gij iucingj Manlinz caeuq Bozsiengh cungj dwg ngauz gyaeuj mbouj ciepsouh. Manlinz caeuq Bozsiengh mizdi simnae, mbouj rox baenzlawz guh cij ndei. Seizneix gou fatyienh Veiyenz gig maj veh veh, yienghneix gou youh siengj daengz le aen banhfap ndeu. Gou bae cauhsi cawx gij vwnzgi veh veh haenx, yienzhaeuh gyau daengz ndaw fwngz Manlinz caeuq Bozsiengh bae, hawj gyoengqde ra gihvei soengq hawj Veiyenz. Aen banhfap neix caen miz yungh dahraix, Veiyenz menhmenh ciepsouh le Manlinz caeuq Bozsiengh.

Ciep roengzdaeuj, gou hawj Veiyenz、Manlinz、Bozsiengh sam boux gap baenz aen hagsib siujcuj ndeu. Veiyenz giekdaej hagsib haemq yaez, Manlinz caeuq Bozsiengh couh baenz bouxlauxsae iq de, fucwz vixyinx caeuq genjcaz gij cozyez Veiyenz, yienghneix haet haemh doengzcaez youq roengz- daeuj, gij gvanhaeh Veiyenz caeuq Manlinz、Bozsiengh yied daeuj yied depgyawj lo.

Miz baengzyoux le Veiyenz hainduj naj riu, hoeng gij riu de cij youq baihnaj Manlinz caeuq Bozsiengh mbehai, youq dangqnaj doengzhag de, de ciuqyiengh lij lau vunz, gou bietdingh aeu bang Veiyenz caencingq yungz haeuj vunzlai ndaw ban bae.

Gihvei ndei daeuj lo, hagdangz dou yaek banh baez doxdax ndeu, Sam Nyied Sam haeuxnaengj gyoebbuenz doxdax, daengz seiz yaek bingz ok aen ciengj “gij cozbinj cauhmoq ceiq ndei” ndeu, gou ceiq gonq siengj daengz Veiyenz lo, gij veh de mboujlwnh dwg gyoeb doz roxnaeuz boiq saek, cungj gig rox cauhmoq, gawqyienz vehveh gij hong saeqsim haenx de cungj guh ndaej baenzlai ndei, haeuxnaengj gyoebbuenz haengjdingh hix mbouj miz vwndiz, yienghneix gou dajciengj Veiyenz camgya doxdax.

“Veiyenz, lauxsae saenq mwngz haengjdingh baenz, cuengq fwngz bae guh couh ndei lo. ” Gangj dwk gou yaep da hawj Manlinz caeuq Bozsiengh, songde hix youq henz de dajciengj. Veiyenz doeklaeng ngaek gyaeuj han lo.

Doxdax ngoenz haenx, ndaw aen ndoengj hung ndeu miz gij gyoebbuenz haeuxnaengj “bizgajgiuh”, sikhaek ciuyinx vunzlai cimyawj. “Va, ndaek bizgajgiuh baenzneix hung! ” Gyoengqvunz ndawde miz hagseng nyaenx mbouj ndaej hemq hwnjdaeuj, yinx daeuj gyoengqvunz humxyawj hab’ingj, neix cingq dwg gij cozbinj Veiyenz. Ginggvaq douzbiuq, Veiyenz aen cozbinj neix ndaej soqbiuq ceiq lai, ndaej aenciengj “gij cozbinj cauhmoq ceiq ndei”, neix hix dwg ban dou daih’it boux aeundaej cungj mingzdaeuz neix.

“Ngoenzneix Veiyenz biujyienh daegbied ndei, vih ban raeuz hingz ndaej mingzdaeuz lo, cingj caezgya bekfwngz hwnj de, docih de vih ban cizdij guh ok gungyen. ” Sing bekfwngz lumj byajraez, caezgya cungj yawj dwk, boiqfug dangqmaz. Veiyenz mizdi gaenjcieng, song faj fwngz mbouj dingz nu bae nu dauq, yawj hwnjdaeuj mizdi gaenjcieng, hoeng ndaw sim de gig angqyangz, aenvih gaeu bak de loh’ok riunyumj.

Youq ndaw saedceij, gou seizseiz cungj louzsim Veiyenz, gou fatyienh daj doxdax gvaq le de hainduj bienq ndaej cizgiz baenaj lo, mboujdan gag rox bang gou sou cozyez, lij caeuq doengzhag wnq itheij guhhong. Gij hawj gou roxnyinh ceiq geizheih haenx, couhdwg miz baez ndeu de gingqyienz gag bauqmingz camgya diuq foux faexsaux doxdax.

Seizneix Veiyenz beij gaxgonq hailangh lai lo, hix yied daeuj yied maij riu lo.