Ndwen 2 ngoenz 12, doiq seizneix gij ngaenzcienz yawhfuengz gaemhanh binghraq caeuq doxgaiq giepnoix, vunzmbanj Laizbinh Si Yinhcwngz Yen Cwngzgvanh Cin Luzvaz Cunh Mbanjgujyangh gag cujciz gien cienz, vunzmbanj youq diegrog hix doenggvaq veihsin gien cienz. Doengzseiz aen mbanj neix aeu 20000 maenz cienz yienzlaiz maeuzveh yungh daeuj guh lohdaeng 2 goengleix roen mbanj haenx gien okdaeuj, ngoenzhaenx aen mbanj neix aeu 23300 maenz cienz gien ndaej haenx gyau daengz hungzsizswvei ndaw yienh, yungh gij hengzdoengh saedsaeh bang hong yawhfuengz gaemhanh binghraq.

Ciuq cam rox, aen mbanj neix youq bineix ndwencieng gaxgonq daengx mbanj 90 lai ranz couz ndaej 20000 maenz cienz, maeuzveh gvaq cieng le yungh daeuj guh lohdaeng 2 goengleix roen mbanj, hawj vunzlai banhaemh byaij roen fuengbienh. Hoeng naemj daengz seizneix hoenx sinhgvanh feiyenz hingzseiq youqgaenj, daengx mbanj 400 lai boux vunzmbanj naeuz, camhseiz mbouj guh lohdaeng, aeu 20000 maenz cienz couz ndaej haenx gien okdaeuj, bang hong yawhfuengz gaemhanh binghraq.

(Fanz Saugvangh/樊绍光)