Gyap:

Gak boux beixnuengx gvaqdaeuj dingq,

Seizneix sinhgvanh feiyenz bingh,

Dangj caeuq cwngfuj gaenq roengz-

lingh,

Caez muengh daihgya dingq youq sim.

Iet:

Bineix fwt fat bingh feiyenz,

Ndwencieng engqgya gwn mbouj

diemz,

Seizneix gizgiz laengz ndaej yiemz,

Bingh neix yungyiemj caen dahraix.

Gyap:

Sinhgvanh feiyenz baenzneix haenq,

Dauqcawq miz vunz deng binghraq,

Gak boux beixnuengx aeu dingq vah,

Gwnz laj caezsim daeuj fuengzre.

Iet:

Daih’it yangjying dangj haucau,

Mbouj saenq yauzyenz mbouj saenq iu,

Cienz yauz famhfap mbouj gangjriu,

Ciuq vah canghyw guh mbouj loeng.

Gyap:

Fouz saeh mbouj ndaej luenh guhdoih,

Bouxoiq bouxlaux cungj vei deng,

Bingh neix baez fat mbouj miz rengz,

Mbouj miz yw ceih engq hojsouh.

Iet:

Okrog itdingh daep goujcau,

Dauqranz ndaejgeiq doq swiq fwngz,

Maqmuengh binghraq mbouj caiq

hwng,

Veiswngh seuqcingh aeu geiq maenh.

Gyap:

Daj dieg binghraq dauqma daeuj,

Aeu dawz youq ranz gaej simfanz,

Mboujguenj okyienh maz cingzgvang,

Sikhaek gangj hawj baihgwnz dingq.

Iet:

Bingh daj bak haeuj geih nohnyaen,

Mbouj ok guhcaemz fuengzre ndei,

Comz gwn mbouj gip youq seizneix,

Gij vah canghyw aeu geiq maenh.

Gyap:

Dingqgangj mbouj ndaej luenh okdou,

Youq ranz hix aeu lai yindung,

Daezsang menjyiz caeuq fangzgung,

Dwk hingz binghraq youq ngoenzcog.

Iet:

Caeuxdi fatyienh caeux baugau,

Ndaej caeux yawj bingh ceng seizgan,

Ciengeiz fat ndat ndoj ndawranz,

Vunzvunz ndang cangq guek onjdingh.

Gyap:

Guekgya cujsiz Siz Ginbingz,

Cijveih daengx guek hoenx binghraq,

Caezsim okrengz caih gwnz laj,

Mbouj caj daiq nanz couh ndaej hingz.

Iet:

Gak boux beixnuengx dingq dou dwen,

Ciengxlwenx gaenriengz gungcanj- dangj,

Dwk hingz fangzgung cujgizcan,

Ndang cangq bouxboux riuhaha.