Gou miz dahnuengxbiuj iq ndeu, heuhguh Dahgyaeu, seizneix ngamq ndaej 13 ndwen hung.

Ngoenzneix gou ndaejhoengq, couh caeuq daxmeh bae ranz de guhcaemz. Bae daengz ranz de, de ngamq ninz banringz hwnq, gou heuh sing“Dahgyaeu”, dah lwgmaet neix dingqnyi le, couh cienq ndang gvaqdaeuj, yungh fwngziq oiqet de nu- nu lwgda, yawjraen gou le, mbe hai aen bak iq, riunyumj lo. Yawj, haujlai nanz mbouj doxraen lo, de lij roxnaj gou bw. Song ceh da ndaemndet itcig muengh gou, lumjbaenz doiq gou naeuz: “Cejbiuj, mwngz ndei!”

Dahgyaeu bizbwdbwd, gig miz- yinx. Byoem de miz di raez, cungj daengj hwnj mbwn bae lo, caen dwg“byoem ndat biengj mauh”ha! Lwgda luenzlulu, aen ndaeng mejmet, lij miz aen bak rox riu dem, caen nyex vunz gyaez ha! Ceiq hawj vunz sim- gyaez dwg de naengnoh youh hau youh oiq lo. Dingqgangj aen siengq ndaej hop bi de lij hwnj densi gvaq, daeng gvaq bauqceij ne!

“A……a……”Dahgyaeu heuh gou, lij soemxsoemx saxsax byaij coh gou. Baez neix, gou mbouj gaen de guhcaemz yaep ndeu mbouj baenz lo. Gou hawj de naengh gwnz ga gou daeuj, gou saenqsaenq ga, yaengyaeng gangj:“Neuz neuz nenj, neuz neuz nenj, daek doengh nenj, nenj haexvaiz……”De itmienh dingq, itmienh ngauz gyaeuj, gij yienghceij de lumj fiz lo. Seizneix, de lumj fatyienh gijmaz ityiengh fwngz vix gwnz buh gou. Gou baez yawj, yienzlaiz dwg gwnz buh gou duz“nouiq”yinx de cimyawj. Ndigah, gou doiq de gangj:“Neix dwg‘nouiq’”. Byawz rox. daxmeh lwnh de baihlaeng gou lij miz duz nouhung dem. Yienghneix, Dahgyaeu engqgya angq lo, heuh gou cienq bae cienq dauq, hawj de yawj song duz nou haenx. Gou cij ndaej dawz buhrog duet roengzdaeuj, hawj de yawj gaeuq bae.

Ceiq mizyinx dwg Dahgyaeu gwn doxgaiq lo. Gou dawz naed dangz QQ coq henz aen bak iq de bae, de iet linx riz baez ndeu, couh nyaeuq da hwnjdaeuj, lumjbaenz gig hoj gwn ityiengh, gvaq yaep ndeu, de sijsaeq sawq gwn le, cij riunyumj lo. Dahnax gangj, Dahgyaeu gwn gijmaz doxgaiq cungj dwg yienghneix. Dah fangz iq neix caen cing ha!

Seizgan mbouj caeux lo, gou aeu baema lo. Dang gou caeuq Dahgyaeu gangj “caiq raen”seiz, de gig sij mbouj ndaej, doeklaeng guh aen“cup”ndeu coh gou“mbin”gvaqdaeuj, daihgya cungj riu lo. Ndaw sim gou siengj, de itdingh maqmuengh gou baezlaeng caiq daeuj, dahnuengxbiuj, cejbiuj itdingh ra seizgan caiq daeuj yawj mwngz.

Dahnuengxbiuj gou Dahgyaeu dwggyaez lwi? Gaej yawj de lij iq, gizsaed de yienghyiengh cungj singj, couh dwg caengz gangj ndaej ok.

（bouxlauxsae son’gyauq：Cinz Cinhdonz/覃珍团）