“O, de couhdwg Aulungz- gveiz!”

“Deng ha, mwngz naeuz de dwg vunzndei roxnaeuz vunzrwix?”

“Doenghbaez dwg vunzrwix!”

“W! Hainduj geij bi haenx, ndaw mbanj lij miz vunz mbouj nyienh hawj de youq gizhaenx, caeklaiq doeklaeng mbouj miz caeggeq caiq haeuj mbanj, ndigah geij bi neix daeuj, caezgya hix couh mbouj lumj doenghbaez baenzneix haemz de lo.”

“Seizneix de dwg vunzndei lo?” Gou ngeizvaeg cam.

“Couh aeu yawj de dwg mbouj dwg caen saeg saej swiq sim lo.” Daiq yousim naeuz:“Dingq gangj bineix gwnzbiengz youh mbouj onj geijlai lo, seizcin fat raemxrongz, caeggeq gwnz bya lumjbaenz youh yaek miz doenghdanh lo!”

“Aulungzgveiz lij caeuq caeg- geq baedauq?” Ndawsim gou miz di gaenj hwnjdaeuj.

“Byawz rox? Seizneix gyoengq vunz ndaw mbanj dauqfanj mbouj gamj doiq de baenzlawz yiengh lo, saeklaeuq gik de huj le, yiengh- haenx——”

“Vunz daengx mbanj youh aeu boihseiz lo.”

“Gou ngeix doengh bi neix daeuj vunzmbanj doiq de lij suenq ndei, de cungj mbouj wnggai caiq aeu haemz boiz aen ba!” Daiq youheiq foebfoeb gangj.

“Daiq, haxbaenh mwngz gangj boux dahsau gyaeundei dwg byawz ne?”(caengz sat)