“Ai! Couhdwg boux gvan dahsau haenx?”

“Deng! Caen hojlienz ha! Dahsau haenx haq bae ngamq seng le laeq daeglwg bizbyobyo, ngamq ndaej ndwen he ne, boux gvan de couh deng caeggeq goenjcug bae lo.”

“Neix caen gvaqbouh lai lo.”

“Deng ha, ndigah ngoenz daihngeih ndaw singz baij bing gvaqdaeuj, youq lajdin gaemhdawz le daegmbauq haenx.”

“De vihmaz mbouj riengz caeggeq caez buetdeuz ne?”

“Aiq dwg ciengjgiep seiz ga deng sieng lo, byaij mbouj ndaej luba!”

Daiq yaepyaep da, hobhob naengbak nyaeuqciu, ndwnj gaemz myaiz he le, laebdaeb naeuz roengzbae:“Gyoengq bing couh dawz de daengz ndaw singz bae gyaeng hwnjdaeuj, baez gyaeng couh gyaeng le song sam bi, gij reihnaz caeuq ranz de hix deng mozsouh gai bae lo, daxmeh de hix daibingh lo, caeklaiq doeklaeng bouxmbauq ranz miz ngaenz deng caeggeq gaemh bae haenx daj gwnz bya deuz dauqma, de cij ndaej cuengq okdaeuj, maranz seiz gaenq gingj bienq vunz liz, saek boux vunzcaen hix mbouj youq lo.”

“Bemx! Byawz hawj de bae guh caeggeq!”

“Hoeng de cungj lij dwg bouxvunz, vunzmbanj yawj cik ga ndeu de gaenq naeuh lo, moix ngoenz couh ninz youq gwnz mbaeklae miuhsaenzvangz, lij mboujyawx boux gaujvaq, ndigah cij yienzliengh de, caezgya hawj di