Cibgouj Daih haihoih,

Gangj mbouj noix diuz daez,

Siz Ginbingz yawj gyae,

Gangj lae lumj raemxmboq.

Cibgouj Daih gangj naeuz,

Hawj raeuz duet gungz hoj,

Hanh bae daengz bi moq,

Duet hoj caeuq duet gungz.

Cibgouj Daih baugau,

Gangj hau lumj dujfaiq,

Haenqrengz guh dahraix,

Cij byaij ndaej daengz gwnz.

Bouxmbanj caeuq bouxrungh,

Miz boux gungz boux hoj,

Daihgya daeuj bangcoh,

Bouxhoj haenh mbouj dingz.

Bouxmbanj caeuq bouxrungh,

Gungzhoj mbouj hawj nem,

Vid dinvaq vid gen,

Haenq rengz doengzdoih guh.

Cibgouj daih gangj ndei,

Diuzdiuz ngeix beksingq,

Seizneix bae yw bingh,

Lij lingh bouj ndaej ngaenz.

Gangj daengz ceih fujbai,

Vunzlai bouxboux angq,

Bouxlawz dwg vunz famh,

Couh fan de roengz daiz.

Ceih fujbai roengz daiz,

Raeuz vunzlai cij onj,

Dangj daiq raeuz byaij gonq,

Onj lumj ruz cib cauh.

Miz roen youh miz dienh,

Fuengbienh raeuz baenzlai,

Okrog roen mbouj byaij,

Bae gai miz ci naengh.

Ndaw mbanj caeuq gwnz haw,

Lumj baujcaw fat rongh,

Gaeq haen sam daengz byongh,

Daeng ndongq lumj daengngoenz.

Gaen riengz gungcanjdangj,

Byaij siujgangh daengz biengz,

Siz Ginbingz swhsiengj,

Raeuz yienghyiengh aeu geiq.

Cwngcwz dingh ndaej ndei,

Sim heiq(nyap) bienq vuenyungz,

Bouxmbanj caeuq bouxrungh,

Cungj doxlumj fatcaiz.

Cibgouj Daih ndei lai,

Nai mbouj sat mbouj caenh,

Gaen riengz gungcanjdangj,

Roen baenaj gvangqlangh.