Ndwen 1 ngoenz 9, aen hoih fatbouh yonjgen fanhoiz yaemvah cinwngz vah saw minzcuz nem aen yizsi giensoengq Cungguek Minzcuz Yijvwnz Fanhyizgiz youq Baekging Gozyiz Binhgvanj banh.

Ciuq cam rox, geij bi neix daeuj, Cungguek Minzcuz Yijvwnz Fanhyizgiz gaenjndaet hopheux gij daihbuenz hong dangj caeuq guekgya, leihyungh “muengxdoxlienz+” gisuz, aeu vah saw minzcuz saenqsikvaq dangguh gij fwngzgaem youqgaenj hawj vah gak minzcuz doxdoeng, haenqrengz guh ndei, aeundaej baenzroix cingzcik. Daengz seizneix, yenzfaz baenz Mungz- guj、Cang、Veizvuzwj、Hahsazgwz、Cauzsenh、Yiz、Cuengh 7 loh vah saw minzcuz cinwngz fanhoiz、yaemvah cienj raiz、aen hidungj hoih minz Gun、seizseiz fanhoiz minz Gun、fanhoiz cinwngz yaemvah daengj 50 lai aen yonjgen yungh vah saw minzcuz, daplaeb le muengx youqsienq fanhoiz vah saw minzcuz Cungguek Minzcuz Yijvwnz Fanhyizgiz www.mzywfy.org.cn, caemhcaiq aeu gij cingzcik neix gunghawj caezgya yungh mbouj aeu cienz.

Mwh hai hoih, Guekgya Minzveij fucujyin Cinz Gaijhu soengq aen yonjgen hawj doengh boux daibyauj Neimungzguj、Gizlinz、Guengjsae、Swconh、Sihcang、Sinhgyangh daengj swngj、swcigih minz(cungh)veij(giz). Guekgya Minzveij mizgven bouhmonz caeuq doengh bouxvunz fucwz Nei- mungzguj、Gizlinz、Guengjsae、Swconh、Sihcang、Sinhgyangh daengj swngj、swcigih minz(cungh)veij(giz) daengj 50 lai vunz wngqiu caeuqfaenh aen hoih fatbouh nem aen yizsi giensoengq.